Dövlət Sərhəd Xidmətinin rəisi, Sərhəd Qoşunlarının komandanı general-leytenant Elçin Quliyev Azərbaycan Prezidentini, Ali baş komandanı qarşıladı və ona raport verdi.

Ali baş komandan İlham Əliyev əsgərləri salamladı.

Əsgərlərin ifasında Azərbaycanın dövlət himni səsləndi.

Görüşü Dövlət Sərhəd Xidmətinin rəisi general-leytenant Elçin Quliyev açdı.

DÖVLƏT SƏRHƏD XİDMƏTİNİN RƏİSİ, SƏRHƏD

QOŞUNLARININ KOMANDANI

GENERAL-LEYTENANT ELÇİN QULİYEVİN

ÇIXIŞI

- Cənab Ali baş komandan!

Dövlətimizin gələcəyi, xalqımızın rifahı naminə gərgin iş rejiminə baxmayaraq, şəxsi heyətimizi Ali baş komandanla görüşmək şərəfinə layiq bilərək, bu günü Dövlət Sərhəd Xidmətinin həyatında əlamətdar etdiniz. İcazə verin, Azərbaycan Respublikası Dövlət Sərhəd Xidmətinin bütün şəxsi heyəti adından Sizi salamlayaraq, bu tarixi hadisə ilə əlaqədar keçirdiyimiz iftixar hissi ilə yanaşı, dərin minnətdarlığımızı və ehtiramımızı çatdırım.

Cənab Ali baş komandan!

Cənab çavuşlar, gizirlər və əsgərlər!

Azərbaycan Respublikası Dövlət Sərhəd Xidmətinin şəxsi heyəti tərəfindən dövlət sərhədlərinin mühafizə altına götürülməsi, Sərhəd Qoşunlarının formalaşması və təşəkkül tapması, əldə edilmiş uğur və nailiyyətlərimiz böyük öndər Heydər Əliyevin adı ilə bağlıdır. Ötən əsrin 70-ci illərindən başlayaraq, Azərbaycan gənclərinin ali hərbi təhsil müəssisələrinə cəlb edilməsi, Cəmşid Naxçıvanski adına hərbi məktəbin yaradılması, azərbaycanlı sərhədçi-zabit kadrlarının yetişdirilməsi, respublika ərazisində yerləşən sərhəd dəstələrinin maddi-texniki bazasının gücləndirilməsi istiqamətində dahi öndərimizin gördüyü işlərin nəticəsidir ki, Azərbaycan Respublikası keçmiş sovet respublikaları arasında öz sərhədlərini müstəqil qoruyan ilk dövlət olmuşdur. Qürur hissi ilə qeyd edirəm ki, üçrəngli bayrağımızın Azərbaycanın Silahlı Qüvvələrində ilk dəfə olaraq, 1992-ci il sentyabrın 29-da ümummilli liderimiz Heydər Əliyevin göstərişi və bilavasitə iştirakı ilə Naxçıvan sərhəd dəstəsində qaldırılması Azərbaycanın sərhəd mühafizəsi tarixində ən şanlı səhifələrdəndir.

Müstəqillik əldə etdikdən sonra qarşıda duran əsas vəzifələrdən biri də şimal və şimal-qərb sərhədlərinin mühafizə altına götürülməsi idi. Həmin dövrdə ölkədəki xaos və hərc-mərclik dövlət sərhədlərinin mühafizə altına götürülməsinə ciddi maneələr yaratmışdı. 1993-cü ildə ümummilli liderimizin hakimiyyətə qayıdışı ordu quruculuğunun bütün sahələrində olduğu kimi, Sərhəd Qoşunlarının da inkişafında, o cümlədən sərhədlərin mühafizə altına götürülməsi işində mühüm rol oynadı. Yarandığı müddətdə zəruri sərhəd infrastrukturu olmayan Xudat sərhəd dəstəsi qısa müddət ərzində müasir sərhəd xidməti tələblərinə cavab verən mobil sərhəd dəstəsi səviyyəsinə yüksəlmişdir. Xidmət müddəti ərzində sərhəd dəstəsinin əldə etdiyi nailiyyətlər sırasında dövlətçiliyimiz əleyhinə fəaliyyət göstərən separatçı və cinayətkar qrupların, yaraqlı dəstələrin zərərsizləşdirilməsi, dövlət sərhədində 25 sərhəd məntəqəsinin tikilib istifadəyə verilməsi, beş minə yaxın sərhəd pozucusunun saxlanılmasını, dövlət sərhədində külli miqdarda qaçaq malın, narkotik maddələrin, silah-sursatın, alışdırıcı və partlayıcı maddələrin keçirilməsinin qarşısının alınmasını qeyd etmək istərdim.

Önəmlidir ki, bu nailiyyətlərin və aparılmış quruculuq işlərinin arxasında yerli əhalinin sərhədçilərə dəstəyi, icra hakimiyyəti və hüquq mühafizə orqanlarının yaxın köməyi durmuşdur. Sərhəd rejimi haqqında təsəvvürə malik olmayan yerli əhali bu gün dövlət sərhədinə müqəddəs məfhum kimi münasibət bəsləyir.

Bununla yanaşı, Rusiya Federasiyası ilə ikitərəfli münasibətlərin dostluq və faydalı əməkdaşlıq müstəvisində inkişafı, bu istiqamətdə Azərbaycan Prezidenti tərəfindən atılan ciddi addımlar sərhəd mühafizəsinin müasir tələblər səviyyəsində qurulmasına, transsərhəd əlaqələrinin genişləndirilməsinə öz müsbət təsirini göstərir.

Möhtərəm Prezident,

Yaradıcısı dahi Heydər Əliyev olan Dövlət Sərhəd Xidməti gələcəyinə inamla baxır. Bu, ümummilli liderimizin və Sizin Azərbaycanın sərhəd mühafizəsinə və Dövlət Sərhəd Xidmətinin şəxsi heyətinə göstərdiyiniz qayğının nəticəsidir. Bu gün biz qarşımızda duran vəzifələrin müasir tələblər səviyyəsində yerinə yetirilməsi üçün tədbirlər görürük. Bu məqsədlə perspektiv inkişaf proqramı hazırlanmışdır və həyata keçirilir. Həmin proqram əsasında dövlət sərhədlərinin toxunulmazlığının təmin edilməsi, o cümlədən beynəlxalq terrorizmə, qeyri-leqal miqrasiyaya, narkotik vasitələrin qanunsuz dövriyyəsinə, qaçaqmalçılığa qarşı mübarizədə imkanlarımızın genişləndirilməsi, yeni sərhəd məntəqələrinin əsaslı tikintisi, dövlət sərhədində mühəndis-texniki qurğuların bərpa edilməsi, qoşunların döyüş və səfərbərlik hazırlığının artırılması, müasir idarəetmə infrastrukturunun yaradılması, kadrların təkmilləşdirilməsi, buraxılış məntəqələrində sərhəd nəzarətinin müasir tələblər səviyyəsində təşkil edilməsi, beynəlxalq sərhəd əməkdaşlığının inkişafı, şəxsi heyətin mənəvi-psixoloji durumunun yüksək səviyyədə saxlanılması, hərbi qulluqçuların maddi, sosial, hüquqi təminatının yaxşılaşdırılması üzrə mühüm tədbirlər görülür. Xəzər dənizində dövlət sərhəd mühafizəsinin gücləndirilməsi, neft yataqlarının və ixrac boru kəmərlərinin mühafizəsi qarşımızda duran əsas vəzifələrdəndir. Bu məqsədlə cari ilin may ayında Lənkəran, Xudat və Şəmkir sərhəd dəstələrinin gözətçi gəmilərinin və aviasiyasının cəlb edilməsi ilə Xəzər dənizinin Azərbaycana məxsus bölməsində taktiki təlimlər keçirilmişdir.

2003-2004-cü illərdə Dövlət Sərhəd Xidmətinə ayırdığınız vəsaitlə, əsasən, aşağıdakı işlər görülmüşdür: Zaqatala, Horadiz və Şəki sərhəd dəstələrində, 40-a yaxın sərhəd zastavasının, sərhədçilərin hazırlanması üçün təlim-tədris mərkəzinin tikintiləri başa çatdırılmışdır. Xudat və Zaqatala sərhəd dəstələrində hərbi şəhərciklərin, idman komplekslərinin, Dövlət Sərhəd Xidmətinin mərkəzi aparatının və hərbi hospitalının tikintisi yaxın zamanda yekunlaşacaqdır.

Möhtərəm Prezident, cari ilin yanvar ayından etibarən Dövlət Sərhəd Xidməti ilə əlaqədar 8 fərman və sərəncam imzalamağınız, o cümlədən normativ-hüquqi bazanın təkmilləşdirilməsi, şəxsi heyətin say tərkibinin artırılması, Naxçıvan sərhəd dəstəsinin bazasında sərhəd diviziyasının yaradılması və digər tədbirlər sərhəd xidmətinə xüsusi diqqətinizin təzahürüdür. Bu, bizim şəxsi heyətimizi xidmətdə daha yüksək nailiyyətlər əldə etməyə ruhlandırmışdır. Bu münasibət bizim üçün şərəf və böyük etimaddır. Biz bu məsuliyyəti dərk edir, qarşımızda qoyduğunuz vəzifələri və göstərişlərinizi yüksək səviyyədə icra etmək üçün daim çalışırıq.

Möhtərəm Prezident, cənab Ali baş komandan! Bütün şəxsi heyətimiz adından Sizi əmin edirəm ki, Heydər Əliyev ideyalarına sadiq olan Azərbaycan sərhədçiləri Prezidentə, dövlətimizə və xalqımıza ləyaqətlə xidmət edəcək, dövlət sərhədlərinin etibarlı mühafizəsini təmin edərək, göstərdiyiniz yüksək etimadı doğruldacaqdır.

X X X

Prezident İlham Əliyev sərhədçilər qarşısında nitq söylədi.