AZƏRBAYCAN PREZİDENTİ İLHAM ƏLİYEVİN ÇIXIŞI
- Hörmətli cənab doktor Nəiri, çox sağ olun. Sizi və bütün dostlarımızı, qardaşlarımızı ürəkdən salamlayıram.
İlk növbədə, bəyan etdiyiniz hədiyyəyə görə sizə minnətdaram. Bu doğrudan da xəstələrə böyük kömək olacaqdır və insanlar öz sağlamlığını saxlamaq üçün, bərpa etmək üçün “Emray”dan keçib dəqiq diaqnoz əldə edəcəklər. Bu, böyük hədiyyədir, dəyərli hədiyyədir. Əlbəttə, bu, onu göstərir ki, sizin Azərbaycana etdiyiniz bütün yardımlar həqiqi mənada təmiz ürəkdən gəlir.
Mən bilirəm ki, “İmdad” komitəsi Azərbaycanda çətin vəziyyətdə yaşayan insanlara, on minlərlə insana böyük kömək göstəribdir və bu kömək, yardımlar davam edir. Bu, bizim üçün həm əməli-praktiki cəhətdən, həm də mənəvi cəhətdən böyük dəstəkdir. Mən bu vaxta qədər edilmiş bütün yardımlara görə şəxsən öz adımdan sizə minnətdarlığımı bildirirəm.
Ermənistanın Azərbaycana etdiyi təcavüz və aparılmış etnik təmizləmə siyasəti nəticəsində 1 milyondan artıq azərbaycanlı öz doğma yurdundan didərgin düşmüşdür və qaçqın-koçkün vəziyyətində yaşayır. Bu münaqişə başlayanda, demək olar ki, Azərbaycanın heç bir maddi, iqtisadi imkanı yox idi. Ölkədə iqtisadi böhran hökm sürürdü və yardıma, köməyə çox böyük ehtiyac var idi. Biz də bu köməyi gördük. Sizin təşkilatınız bu köməyi göstərdi və çətin vəziyyətdə yaşayanlara əsil dost kimi, qardaş kimi sözdə deyil, işdə öz kömək əlini uzatdı.
Bu gün də bu xeyriyyə işləri davam edir, “İmdad” komitəsi öz fəaliyyətini davam etdirir və əlbəttə ki, bu, çətin vəziyyətdə, yoxsulluq içində yaşayan insanlar üçün böyük dəstəkdir. Çıxışınızda qeyd etdiniz ki, Azərbaycanda yoxsulluğun azaldılmasına dair proqram həyata keçirilir. Bizim məqsədimiz budur ki, Azərbaycanda, ümumiyyətlə, yoxsulluq olmasın, aradan götürülsün. Amma əlbəttə, bu, böyük maliyyə tələb edir və biz yoxsul vəziyyətdə yaşayanların sayını ildən-ilə azaldırıq. Yəni bu meyil müsbət istiqamətdə inkişaf edir. Amma yenə də ölkədə bu qədər problem vardır. Xüsusilə də öz torpaqlarını itirmiş qaçqın-köçkünlərin problemləri. Onların həyat səviyyəsi bu gün nə həmin insanları, nə də bizi qane edir və belə olan halda, xeyriyyə təşkilatlarının köməyinə hələ ehtiyac vardır.
Bir məqamı da demək istəyirəm ki, bizə kömək göstərən bəzi beynəlxalq donor təşkilatları, xeyriyyə cəmiyyətləri indi bunu dayandırırlar və izah edirlər ki, on ildən çoxdur bu kömək göstərilir və daha onların belə bir imkanları yoxdur. “İmdad” komitəsi isə əksinə, nəinki, bunu dayandırmır, hətta indi bu yardımın yeni formasını təklif edir. Bu, Prezident kimi məni çox sevindirir. Mən buna görə sizə çox minnətdaram. Əsil dost odur ki, çətin vəziyyətdə yanında olsun. Biz də bu dostluğu görürük və bunu yüksək qiymətləndiririk.
Onu da qeyd etmək istəyirəm ki, ümumiyyətlə, ölkələrimiz arasında münasibətlər yeni mərhələyə çıxıbdır. Hörmətli Prezident Xatəminin Azərbaycana səfəri və mənim İrana indiki səfərim bizim ölkələrimizi bir-birinə daha da yaxın edibdir. Bizim sıx əməkdaşlığımız hər iki ölkənin milli marağına cavab verir. Mən İrana bu niyyətlə gəlmişəm ki, bizim aramızda əlaqələr daha da güclənsin, inkişaf etsin, İran və Azərbaycan birgə çoxlu layihələr həyata keçirsin və bütün sahələrdə əməkdaşlıq daha da güclənsin. Ümid edirəm, bundan sonra da bizim aramızda bu işgüzar münasibətlər davam edəcək, “İmdad” komitəsi öz fəaliyyətini keçmişdə olduğu kimi, yenə də yüksək səviyyədə davam etdirəcəkdir. Bizim də vəzifəli şəxslərimiz, aidiyyəti orqanlar bu işdə sizinlə bərabər işləyəcəklər ki, Azərbaycanda çətin vəziyyətdə yaşayanların həyat səviyyəsi yaxşılaşsın.
X X X
Sonra Prezident İlham Əliyev komitənin Azərbaycandakı fəaliyyətindən bəhs edən fotosərgi ilə tanış oldu.
Görüşdən xatirə olaraq Azərbaycan Prezidentinə xalça hədiyyə edildi.
Dövlətimizin başçısı komitənin binasında Azərbaycandan gələn qadınlarla görüşüb səmimi söhbət etdi və onlarla xatirə şəkli çəkdirdi.
Daha sonra Prezident İlham Əliyev “İmdad” komitəsinin fəxri qonaqları kitabına ürək sözlərini yazdı.
Bölmənin digər xəbərləri
