AZƏRBAYCAN PREZİDENTİ YANINDA SAHİBKARLAR ŞURASININ BİRİNCİ İCLASI KEÇİRİLMİŞDİR
İyulun 8-də “Həyat Recensi” otelində Azərbaycan Respublikasının Prezidenti yanında Sahibkarlar Şurasının birinci iclası keçirilmişdir. İclasda xarici ölkələrin Azərbaycandakı səfirliklərinin, beynəlxalq təşkilatların nümayəndələri də iştirak edirdilər. İclası şuranın sədri, Azərbaycanın iqtisadi inkişaf naziri Fərhad Əliyev açmış, sahibkarlığın inkişafında şuranın əhəmiyyəti haqqında, bu qurumun fəaliyyətinin təmin edilməsi istiqamətində görülmüş işlər barədə məlumat vermişdir. Natiq respublika Prezidentinin 2 may 2003-cü il tarixli Fərmanı ilə Sahibkarlar Şurasının Əsasnaməsinin təsdiq olunduğunu xatırlatmış, sahibkarlığa dövlət yardımının istiqamətlərinin, ölkənin ayrı-ayrı bölgələrində bu işin dəstəklənməsi tədbirlərinin müəyyənləşdirilməsində, sahibkarlıq fəaliyyətini tənzimləyən qanunvericilik bazasının təkmilləşdirilməsi ilə bağlı təkliflərin hazırlanmasında, ortaya çıxan problemlərin operativ həllində, sahibkarlıq subyektləri arasında kooperasiya əlaqələrinin stimullaşdırılmasında şuranın xüsusi əhəmiyyətini vurğulamışdır. Sahibkarlar Şurası katibliyinin rəhbəri Əlihüseyn Şaliyev Azərbaycan Prezidentinin 2002-ci il aprel-may aylarında sahibkarlarla görüşlərindən sonra həllini tapmış işlər haqqında məruzə etmişdir. Məruzə ətrafında müzakirələrdə şura üzvlərindən Nurəddin Hüseynov, Qüdrət Kərimov, Təyyar Şükürov, Kamal Yazıçıoğlu və başqaları çıxış etmişlər. Sahibkarlar Şurasının sədri Fərhad Əliyev “Sahibkarlar günü”nün müəyyən olunması barədə təkliflər paketini şura üzvlərinin müzakirəsinə vermişdir. Şuranın sədri Sahibkarlar gününün müəyyən olunması, həmin gün ölkə miqyasında sahibkarlığın təbliği və stimullaşdırılması istiqamətində həyata keçirilməsi zəruri olan tədbirlər haqqında danışmışdır. KİV-də sahibkarlığın təbliğinə geniş yer ayrılması, İqtisadi İnkişaf Nazirliyinin məsul işçiləri ilə sahibkarlıq subyektləri arasında görüşlərin – “açıq qapı” günlərinin keçirilməsi, hər il “İlin ən yaxşı sahibkarı” müsabiqəsinin təşkil edilməsi, qalibin fəxri ada layiq görülməsi bu tədbirlərə daxildir. Ölkəmizdə sahibkarlığın inkişafında yeni mərhələnin başlandığı günü- Azərbaycan Prezidentinin 2002-ci ildə sahibkarlarla görüşdüyü 25 aprel gününü “Sahibkarlar günü” elan etmək təklif olunmuşdur. Bu məsələ ilə bağlı təkliflər paketini müvafiq strukturlara təqdim etmək qərara alınmışdır. Sahibkarlar Şurasının birinci iclasında təşkilati məsələlərə də baxılmışdır. “Azərbaycan Respublikasının Prezidenti yanında Sahibkarlar Şurası haqqında Əsasnamə”yə uyğun olaraq şura üzvlərindən iki nəfər – “Qaradağ Sement” Səhmdar Cəmiyyəti idarə heyətinin sədri Aleks Traun və “Azərbaycanda sərmayələrin Təşviqi və Məsləhət Fondu”nun prezidenti vəzifəsini icra edən Mikayıl Cabbarov şura sədrinin müavinləri seçilmişlər. Şuranın iclaslarında baxılacaq müvafiq sənədlərin hazırlanması məqsədi ilə işçi qruplarının yaradılması məsələsi müzakirə edilmiş və 7 işçi qrupun yaradılması barədə katibliyə müvafiq tapşırıq verilmişdir. Sahibkarlar Şurasının birinci iclasında Azərbaycan Respublikasının Prezidenti Heydər Əliyevə müraciət qəbul edilmişdir. Müraciətdə deyilir: “Möhtərəm Prezident! Bu gün Azərbaycan Respublikasının inkişaf və tərəqqi yolunda sürətlə irəliləməsi Sizin müdrik siyasi rəhbərliyinizin parlaq təzahürüdür. Müstəqillik dövründə ölkənin iqtisadi əsaslarının möhkəmləndirilməsində əldə edilmiş nailiyyətlər, uğurlu neft strategiyasının həyata keçirilməsi, ölkəyə sərmayə qoyuluşunun həcminin dinamik artımı, əlverişli sahibkarlıq mühitinin yaradılması, MDB məkanında ilk dəfə olaraq radikal torpaq islahatının aparılması, cəmiyyətimizin sosial-iqtisadi həyatının digər sahələrində nəzərəçarpacaq yüksəliş məhz Sizin adınızla bağlıdır. Son illərdə sahibkarlığın inkişafı, yeni təfəkkürlü sahibkarlar təbəqəsinin formalaşması ilə bağlı imzaladığınız çox mühüm fərman və sərəncamlar iqtisadi inkişafa güclü təkan vermişdir. Biz bu tarixi qərarları Sizin rəhbərliyinizlə ardıcıl olaraq həyata keçirilən sosial-iqtisadi inkişaf strategiyasının öncül istiqamətlərindən olan sahibkarlığın inkişafına dövlət qayğısının növbəti mərhələsi kimi yüksək qiymətləndiririk. Bu qərarlar artıq ölkənin sahibkarlıq bölməsində əhəmiyyətli keyfiyyət dəyişikliklərinə gətirib çıxarmışdır. Əminik ki, Azərbaycan Respublikası Prezidenti yanında yaradılmış Sahibkarlar Şurası həyata keçirilən islahatların iqtisadiyyatın müxtəlif sahələrinə daha sürətlə nüfuz etməsinə, uzaqgörən dövlət siyasətinin daha səmərəli tətbiqinə xidmət edəcəkdir. Ölkəyə rəhbərliyiniz dövründə həyata keçirdiyiniz fundamental işlər xalqa xidmət nümunəsi sayıla bilər və biz Azərbaycan Respublikasının gələcək uğurlarını da Sizin müdrik, uzaqgörən rəhbərliyinizdə görürük. Biz, Sahibkarlar Şurasının üzvləri göstərdiyiniz yüksək etimada görə Sizə təşəkkür edir, möhkəm cansağlığı, Azərbaycan Respublikasının inkişafı naminə fədakar fəaliyyətinizdə yeni-yeni uğurlar arzulayırıq. Sizi əmin edirik ki, bundan sonra da “İqtisadiyyatı güclü olan dövlət hər şeyə qadirdir” müdrik kəlamınızın reallaşmasına çalışacağıq”.
Bölmənin digər xəbərləri
