Azərbaycan regionun gələcək inkişafının təminatçısıdır
Bakı, 13 yanvar, AZƏRTAC
Yanvarın 11-də Moskvada Rusiya Prezidenti Vladimir Putin, Azərbaycan Prezidenti İlham Əliyev və Ermənistanın Baş naziri Nikol Paşinyan arasında üçtərəfli görüş keçirildi. Bu görüş noyabrın 10-da imzalanmış bəyanatdan sonrakı dövrdə əldə olunan nəticələrin müzakirəsi baxımından hesabat xarakterli idi. Bu nöqteyi-nəzərdən, görüşün əsas məqsədi Qarabağa dair imzalanmış məlum bəyanatın reallaşdırılmasının gedişini, yaranmış mövcud problemlərin aradan qaldırılması və regionda dinc həyatın qaydaya salınması ilə bağlı növbəti addımları birlikdə müzakirə etmək idi.
Bunu AZƏRTAC-a açıqlamasında Milli Məclisin deputatı Tamam Cəfərova deyib.
T.Cəfərova qeyd edib ki, Moskva görüşü Azərbaycanın hərbi-siyasi yolla qazandığı tarixi Zəfərin daha da möhkəmlənməsi baxımından növbəti diplomatik mərhələ oldu. Nəzərə alsaq ki, 2020-ci il 10 noyabr tarixli 9 bəndlik birgə Bəyanat Ermənistanın kapitulyasiya aktına imza atması idi, o zaman 4 bənddən ibarət bu bəyanat həmin prosesin davamı kimi qiymətləndirilməlidir.
Deputat vurğulayıb ki, Moskva görüşünün ən vacib məqamlarından biri tərəflərin 10 noyabr tarixli bəyanatının regiondakı bütün iqtisadi və nəqliyyat kommunikasiyalarının açılmasını nəzərdə tutan 9-cu bəndinin həyata keçirilməsinə dair üçtərəfli işçi qrupun yaradılması barədə razılıq əldə etməsidir. Azərbaycan, Ermənistan və Rusiyanın Baş nazir müavinlərinin rəhbərlik edəcəyi işçi qrup yanvarın 30-dək ilk iclasını keçirəcək, fəaliyyət istiqamətləri üzrə ekspert alt qrupları yaradacaq. Dövlət orqanlarının səlahiyyətli nümayəndələrindən təşkil olunacaq ekspert alt qrupları bir ay ərzində layihələri, eləcə də onların icrası üçün lazımi resurs və tədbirlərin siyahılarını təqdim edəcəklər. Prezident İlham Əliyevin dediyi kimi, regionun bundan sonrakı davamlı və təhlükəsiz inkişafını təmin etmək üçün Moskva görüşü çox vacib idi.
“Burada vurğulamalı olduğumuz əsas məqam ondan ibarətdir ki, kommunikasiyaların bərpası Azərbaycan, Ermənistan, Rusiya və regionun digər dövlətlərinin maraqlarına cavab verir. Beynəlxalq kommunikasiyaların bərpası regionun inkişafında dinamizm yaratmaqla bərabər, həm də etibarlı təhlükəsizliyə xidmət edəcək. Bütün bunlar onu deməyə əsas verir ki, Azərbaycan regionun gələcək inkişafının təminatçısıdır”, - deyən deputat qeyd edib ki, ən vacib məqamlardan biri Azərbaycanı Naxçıvanla birləşdirən dəmir və avtomobil yollarının təmin edilməsidir. Bu, olduqca mühüm kommunikasiyadır və təkcə Azərbaycanın deyil, qardaş Türkiyənin, eyni zamanda, digər qonşu ölkələrin də iqtisadi maraqlarının təmin olunması baxımından mühüm əhəmiyyət kəsb edir. Bu kommunikasiya xətlərinin açılması nəticəsində Azərbaycanın Naxçıvan Muxtar Respublikası, həmçinin Türkiyə ilə əlaqələri güclənəcək, ölkəmizin geoiqtisadi əhəmiyyəti artacaq.
“Moskva görüşü Qarabağ münaqişəsinin keçmişdə qaldığını özlüyündə bir daha təsdiq etdi. Azərbaycan tərəfi qapalı görüşdə istədiyinə nail oldu. Ortaq bəyanatın mətni - humanitar və kommunikasiya məsələləri ilə bağlı üçtərəfli işçi qrupunun yaradılması da bunu təsdiqləyir. Əgər rəsmi Bakının şərtləri qəbul edilməsəydi, üçtərəfli əməkdaşlıq formatı olmayacaqdı - xüsusilə nəzərə alsaq ki, İkinci Qarabağ müharibəsinədək 30 il ərzində aparılan danışıqlar Azərbaycan üçün nəticəsiz diplomatik prosedur idi. Qarabağ problemi hərbi yolla həllini tapdıqdan sonra artıq rollar dəyişib. Ermənistan Azərbaycanın onun üçün irəli sürdüyü əməkdaşlıq şərtlərini qəbul etməyə məcburdur. Əgər Paşinyan hökuməti bir az olsa öz xalqının rifahını düşünürsə, Azərbaycanın şərtləri ilə qeyd-şərtsiz razılaşmalıdır”, - deyə Tamam Cəfərova bildirib.
Bölmənin digər xəbərləri
