Azərbaycan Respublikasının Aktau şəhərindəki Baş konsulluğu 20 Yanvar faciəsi ilə bağlı tədbirlər keçirmişlər
Aktau, 21 yanvar (AZƏRTAC). Azərbaycan Respublikası Prezidenti Administrasiyası Rəhbərinin müvafiq Sərəncamı ilə təsdiq olunmuş “20 yanvar faciəsinin 24-cü ildönümünün keçirilməsi illə bağlı Tədbirlər Planı”na uyğun olaraq Azərbaycan Respublikasının Aktaudakı Baş konsulluğu tərəfindən silsilə tədbirlər keçirilmişdir.
20 Yanvar faciəsi ilə bağlı yanvarın 17-dən 20-dək Baş konsulluğun konsul dairəsinə daxil olan Atırau, Aktyubinsk və Qərbi-Qazaxıstan vilayətlərində fəaliyyət göstərən azərbaycanlıların diaspor təşkilatlarında da Baş konsulluğun dəstəyi ilə anım tədbirləri keçirilmişdir.
Aktau şəhəri Ş.Yesenov adına Kaspi Dövlət Texnologiya və Mühəndislik Universitetində “Azərbaycan Respublikasının tarixi və mədəniyyətinin tədqiqatı Mərkəzi”ndə ictimaiyyət nümayəndələri, müəllimlər, tələbələr və kütləvi informasiya vasitələri nümayəndələrinin iştirakı ilə “dəyirmi masa” keçirilmişdir. “Dəyirmi masa”da 1990-cı ilin yanvar ayının 19-dan 20-nə keçən gecə sovet qoşunlarının Azərbaycana, xüsusən də Bakı və Sumqayıt şəhərlərinə daxil olması, dinc insanların qətlə yetirilməsi barədə danışılmış, elm adamlarının, tarixçilərin, ziyalıların və siyasətçilərin qanlı hadisələrlə bağlı fikirləri müzakirə edilmişdir.
Tədbirin sonunda 20 Yanvar faciəsi ilə bağlı film nümayiş etdirilmişdir.
İlahə Əhmədova
AZƏRTAC-ın xüsusi müxbiri
Aktau
Bölmənin digər xəbərləri
