Azərbaycan Respublikasının Beynəlxalq İnkişafa Yardım Agentliyi ilə BMT arasında əməkdaşlıq müzakirə edilib
Bakı, 9 mart, AZƏRTAC
Azərbaycan Respublikasının Beynəlxalq İnkişafa Yardım Agentliyinin (AIDA) rəisi Əşrəf Şıxəliyev BMT baş katibinin köməkçisi, BMT İnkişaf Proqramının (BMT İP) Xarici Əlaqələr və Vəkillik Ofisinin rəhbəri Maykl O’Neil ilə görüşüb.
Xarici İşlər Nazirliyinin mətbuat xidmətindən AZƏRTAC-a bildiriblər ki, görüşdə Ə.Şıxəliyev AİDA-nın fəaliyyət istiqamətləri və həyata keçirdiyi beynəlxalq layihələr barədə məlumat verib. Sonra tərəflər müxtəlif sahələrdə, eləcə də Ebola epidemiyası ilə mübarizədə AİDA və BMT İP arasında əməkdaşlığın daha da dərinləşdirilməsi məsələləri ətrafında fikir mübadiləsi aparıblar.
Ə.Şıxəliyevin BMT-nin Kapitalın İnkişafı Fondunun icraçı katibinin müavini Xaviyer Mişon ilə görüşündə informasiya-kommunikasiya texnologiyaları, maliyyə xidmətləri, su təchizatı və sanitariya sahələrində qarşılıqlı əməkdaşlıq imkanları müzakirə edilib.
AIDA-nın rəisi, həmçinin BMT İP-in administratorunun köməkçisi, Proqram Siyasəti Ofisinin direktoru Maqdi Martinez-Soliman ilə də görüşüb. Tərəflər müxtəlif sahələrdə, o cümlədən Afrika ölkələrində Ebola epidemiyasının qarşısının alınması istiqamətində əməkdaşlıq imkanlarına dair fikir mübadiləsi aparıblar.
Bölmənin digər xəbərləri
