AZƏRBAYCAN RESPUBLİKASININ MƏTBUAT İŞÇİLƏRİNƏ!
Sizi 22 iyul - Milli Mətbuat günü münasibətilə ürəkdən təbrik edir, hər birinizə ən səmimi arzularımı çatdırıram.
130 ilə yaxın tarixi olan Azərbaycan milli mətbuatının zəngin və şərəfli ənənələri vardır. Azərbaycan mətbuatı həmişə qabaqcıl ictimai fikrin, milli tərəqqi ideyasının carçısı kimi çıxış etmiş, xalqımızın azadlıq arzularının güclənməsində, milli şüurun, mədəniyyətin formalaşmasında böyük rol oynamışdır.
XX əsrin sonlarında yenidən öz dövlət müstəqilliyini qazanmış ölkəmizdə milli dövlət ideyalarının və ənənələrinin möhkəmlənməsində, demokratik dəyərlərin bərqərar olmasında, beynəlxalq aləmdə Azərbaycanın rolunun və nüfuzunun güclənməsində mətbuatımızın xidmətləri xüsusi qeyd edilməlidir.
Öz müstəqilliyinin ikinci onilliyini yaşayan Azərbaycanda demokratik, hüquqi, dünyəvi dövlət quruculuğu prosesi uğurla davam edir. Demokratik inkişafın təməl prinsiplərindən olan söz, fikir və məlumat azadlığının təmin olunması, onların daşıyıcısı olan kütləvi informasiya vasitələrinin inkişafı və sərbəst fəaliyyəti üçün optimal şərait yaradılması Azərbaycanın dövlət başçısı kimi mənim qarşımda duran prioritet vəzifələrdəndir. Biz mətbuata və ümumiyyətlə kütləvi informasiya vasitələrinə hüquqi dövlət və vətəndaş cəmiyyəti quruculuğunda, demokratik hüquq və azadlıqların təmin olunmasında güclü vasitə kimi baxırıq, cəmiyyətin aktual problemlərinin ictimailəşməsində, aşkarlığın və şəffaflığın təmin olunmasında, sivil dünyaya inteqrasiya prosesində onun rolunu lazımınca qiymətləndiririk.
Hər bir ölkədə azad mətbuatın əsas vəzifəsi siyasi plüralizmi, söz və fikir azadlığını daha da dərinləşdirmək, vətəndaşların informasiya ehtiyaclarını ödəməkdən ibarətdir. Lakin bununla yanaşı, düşünürük ki, mətbuatımız bu gün öz mütərəqqi ənənələrini davam etdirərək, həqiqət carçısı rolunda çıxış etməli, cəmiyyətdəki problemləri və nöqsanları ictimai müzakirəyə çıxarmalı, demokratik proseslərin fəal iştirakçısı olmalıdır.
Milli Mətbuat gününü qeyd edərkən Azərbaycanda vətəndaşların əsas hüquq və azadlıqlarının, o cümlədən söz, fikir və məlumat azadlığının təmin olunmasında ümummilli liderimiz Heydər Əliyevin müstəsna xidmətlərini xatırlamaq hamımızın borcudur. Məhz Heydər Əliyevin siyasi iradəsi və məqsədyönlü tədbirləri nəticəsində mətbuatın sərbəst fəaliyyəti üçün bütün imkanlar yaradıldı. Mətbuatın dövlət tənzimlənməsindən imtina edildi, bu sahədə jurnalist ictimaiyyətinin təşəbbüsləri dəstəkləndi. Mətbuatın maddi-texniki bazasının möhkəmləndirilməsi üçün təsirli addımlar atıldı, jurnalist hüquqlarının etibarlı surətdə qorunması təmin edildi. Bu gün Azərbaycanda kütləvi informasiya vasitələri sahəsində MDB məkanında və Şərqi Avropada ən demokratik, liberal qanunvericilik bazası mövcuddur, kütləvi informasiya vasitələrinin geniş inkişaf etmiş şəbəkəsi fəaliyyət göstərir.
Azərbaycan Respublikası söz, fikir və məlumat azadlığının inkişafı sahəsində beynəlxalq təşkilatlarla, o cümlədən Avropa Şurası və ATƏT-lə sıx əməkdaşlıq edir, üzərinə götürdüyü öhdəliklərdən irəli gələn vəzifələri yerinə yetirir. Qanunvericiliyin təkmilləşdirilməsi, beynəlxalq standartlara cavab verən ictimai yayım xidmətinin yaradılması istiqamətində əməkdaşlıq davam etdirilir.
Bu bayram günündə mətbuat işçilərini, bütün vətəndaşlarımızı əmin etmək istəyirəm ki, ümummilli liderimiz Heydər Əliyevin vətəndaşların əsas hüquq və azadlıqlarının, o cümlədən söz, fikir və məlumat azadlığının təmin edilməsi sahəsində siyasəti dönmədən davam etdiriləcək, bu istiqamətdə bütün zəruri addımlar atılacaqdır. Sivil cəmiyyətin vacib atributu olan mətbuata, azad sözə diqqət və qayğı dövlət siyasətinin əsas istiqamətlərindən biri olacaqdır.
Bir daha bayramınızı təbrik edir, hər birinizə cansağlığı, səadət, çətin və şərəfli sənət yolunuzda uğurlar arzulayıram.
İlham Əliyev,
Azərbaycan Respublikasının Prezidenti.
Bakı şəhəri, 21 iyul 2004-cü il.
Bölmənin digər xəbərləri
