AZƏRBAYCAN RESPUBLİKASININ PREZİDENTİ ZATİ-ALİLƏRİ CƏNAB İLHAM ƏLİYEVƏ
Sizi ötən yüzilliyin ən nəhəng sazişi olan “Əsrin müqaviləsi”nin imzalanmasının 10-cu ildönümü münasibətilə səmimi qəlbdən təbrik edirik!
1994-cü il sentyabrın 20-də Azərbaycan xalqının tarixinə qızılı hərflərlə həkk olunmuş “Əsrin müqaviləsi”nin imzalanması bütün dünyaya səs saldı. Müstəqil Azərbaycan dövlətinin memarı və qurucusu, xalqımızın ümummilli lideri Heydər Əliyevin yeni neft strategiyasının ilk addımı atıldı. Bu tarixi andan başlayaraq, ölkənin iqtisadiyyatı dirçəlməyə və inkişaf etməyə başladı. Neft sektoruna xarici sərmayə axınına yol açıldı.
Bütün bunlar Azərbaycanın təkcə zəngin neft ölkəsi olması ilə bağlı deyildir. Əsas səbəblərdən biri 1994-cü ilə qədər xaos və özbaşınalığın hökm sürdüyü, dağılma və parçalanma meyillərinin dövlətin varlığı üçün real təhlükələr doğurduğu Azərbaycanda Heydər Əliyevin tarixi qayıdışından sonra yaradılmış möhkəm ictimai-siyasi sabitlik idi. Dahi şəxsiyyətin, böyük siyasi xadimin və dövlət xadiminin gərgin əməyi, uzaqgörən diplomatiyası, uğurlu daxili və xarici siyasəti sayəsində ölkədə siyasi sabitliyin bərqərar edilməsi dövlətin dayaqlarının möhkəmləndirilməsində, həyatın bütün sahələrini bürümüş tənəzzülün qarşısının alınmasında, ölkənin beynəlxalq nüfuzunun yüksəldilməsində, iqtisadiyyatın sağlamlaşdırılmasında, dünyanın iri neft şirkətləri ilə əməkdaşlığın bünövrəsinin yaradılmasında həlledici rol oynadı.
Dünyanın iqtisadi nəhəngləri Azərbaycana üz tutdular. “Əsrin müqaviləsi”nin ardınca, Xəzər dənizinin Azərbaycan sektorunda karbohidrogen ehtiyatlarının işlənilməsinə dair yeni-yeni müqavilələr hazırlanıb imzalandı. Respublikamızın mənafelərinə tam uyğun olan, ölkə əhalisinin rifah halının yüksəldilməsinə şərait yaradan 23 neft müqaviləsi Azərbaycan iqtisadiyyatına yeni nəfəs gətirdi, eyni zamanda, Cənubi Qafqaz bölgəsinin coğrafi-siyasi mənzərəsini dəyişdirərək, ölkəmizin lider mövqelərini daha da möhkəmləndirdi.
“Əsrin müqaviləsi”nə əsasən, neftin dünya bazarına çıxarılması üçün Bakı-Tbilisi-Ceyhan əsas ixrac boru kəmərinin çəkilməsi qərara alındı. 2002-ci il sentyabrın 18-də Azərbaycan paytaxtı yaxınlığındakı Səngəçal terminalında bu nəhəng layihənin həyata keçirilməsi işlərinə start verildi. Bu münasibətlə keçirilən təntənəli mərasimdə ümummilli liderimiz Heydər Əliyev, Türkiyə və Gürcüstanın prezidentləri, ABŞ-ın energetika naziri və Azərbaycan Beynəlxalq Əməliyyat Şirkətinin prezidenti iştirak etdilər.
“Əsrin müqaviləsi”nin həyata keçirilməsi üçün görülən işlər sayəsində ölkəmizin neft sənayesi yenidən qurulmuş, bu sahədə yüksək peşəkarlığa malik milli kadrlar hazırlanmış, respublikamıza müasir texnologiyalar gətirilmiş, xüsusi nəqliyyat, xidmət sahələri fəaliyyətə başlamış və bütün bunlarla əlaqədar olaraq minlərlə yeni iş yerləri açılmışdır.
Neft strategiyası sahəsində həyata keçirilən ən mühüm tədbirlərdən biri də karbohidrogen ehtiyatlarının işlənilməsi zamanı götürülən gəlirin bir yerə cəmləşdirilməsi məqsədi ilə ümummilli liderimiz Heydər Əliyevin 1999-cu il 29 dekabr tarixli fərmanı əsasında Dövlət Neft Fondunun yaradılması olmuşdur. Bu, ölkənin zəngin neft ehtiyatlarından əldə edilən vəsaitin vətəndaşlar arasında bərabər bölünməsini təmin etmək məqsədi ilə atılmış ən doğru addım idi.
Beləliklə, “Əsrin müqaviləsi”nin imzalanmasından ötən on il ərzində ölkəmizdə baş verən dəyişikliklər və görülən işlər göz qabağındadır. Bütün bunlar ümummilli liderimiz Heydər Əliyevin yaratdığı möhkəm təməl üzərində həyata keçirilir. Respublikamızın iqtisadiyyatının bugünkü ardıcıl inkişafı inamla söyləməyə əsas verir ki, Heydər Əliyev siyasətinin ən layiqli davamçısı kimi Sizin rəhbərliyinizlə yaxın gələcəkdə ölkəmizin iqtisadiyyatı daha da inkişaf edəcək, Azərbaycan dünyanın ən qüdrətli dövlətlərindən birinə çevriləcəkdir.
Möhtərəm cənab Prezident!
Sizi bu tarixi gün münasibətilə bir daha ürəkdən təbrik edir, əsası ümummilli liderimiz Heydər Əliyev tərəfindən qoyulmuş yeni neft strategiyasının uğurla davam etdirilməsi sahəsində yorulmaz fəaliyyətinizdə Sizə yeni-yeni uğurlar arzulayırıq!
Azərbaycan Respublikasının
Milli Məclisi
Bölmənin digər xəbərləri
