AZƏRBAYCAN SƏFİRLİYİ ADINDAN ƏKLİL QOYULMUŞDUR
Fransa Müdafiə Nazirliyi nəzdində müharibə veteranları ilə iş üzrə Dövlət katibliyi iyunun 21-də Nuaye Sen Marten qəsəbəsində Fransanın azadlığı uğrunda həlak olmuş sovet əsgərlərinin xatirəsinə ucaldılmış abidənin təntənəli açılışını keçirmişdir. Əlində gül dəstəsi tutmuş qadının təsvir olunduğu abidə Rusiya Federasiyasının sifarişi ilə hazırlanmışdır.
Açılış mərasimində çıxış edənlər İkinci Dünya müharibəsində faşist Almaniyası üzərində qələbə əldə edilməsində çoxmillətli Sovet Ordusunun qəhrəmanlığından söhbət açmış, dörd mindən artıq fransızın, habelə müxtəlif millətlərin, o cümlədən azərbaycanlı döyüşçülərin dəfn edildiyi qardaşlıq qəbiristanlığında belə bir abidənin ucaldılmasını xalqlar arasında dostluq rəmzi kimi qiymətləndirmişlər.
Azərbaycan Respublikasının Fransadakı səfiri Eleonora Hüseynova, Azərbaycan icmasının üzvü, müharibə iştirakçısı Qədir Süleyman mərasimdə iştirak etmişlər.
Abidənin önünə ölkəmizin Fransadakı səfirliyi adından da əklil qoyulmuşdur. Əklilin üzərindəki lentdə “Fransa uğrunda həlak olmuş azərbaycanlı vətəndaşlara” sözləri yazılmışdır.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
