AZƏRBAYCAN TƏHLÜKƏSİZLİK ORQANLARININ 87 İLLİYİ MÜNASİBƏTİLƏ GÖRÜŞ KEÇİRİLMİŞDİR
Tədbir iştirakçıları, əvvəlcə, ümummilli lider Heydər Əliyevin rayon icra hakimiyyəti aparatının inzibati binası qarşısında ucaldılmış büstü önünə tər qərənfillər düzmüş, müstəqil dövlətimizin qurucusunun xatirəsinə hörmət və ehtiramlarını bildirmiş, sonra iclas salonunun foyesində təşkil olunmuş “MTN-87” fotosərgisinə baxmışlar.
Azərbaycanın Dövlət himni səslənmişdir. Nazirliyin rayon şöbəsinin rəisi Araz Əhmədov və MTN-in əməkdaşı Lətif Babayev şanlı ənənələri olan təhlükəsizlik xidməti orqanlarının yaradılmasından, inkişaf tarixindən danışaraq bildirmişlər ki, 1919-cu il martın 28-də Azərbaycan Xalq Cümhuriyyəti Hərbi Nazirliyinin Baş Qərargahı nəzdində kəşfiyyat və əks-kəşfiyyat bölməsinin yaradılması ilə təməli qoyulan təhlükəsizlik orqanları 1956-65-ci illərdə ümummilli liderimiz Heydər Əliyevin Dövlət Təhlükəsizliyi Komitəsində, əvvəlcə, əks-kəşfiyyata, 1967-ci ildən isə Komitəyə rəhbərliyi dövründə keyfiyyətcə yeni mərhələyə qədəm qoymuş, burada çalışan milli kadrların sayı qısa müddətdə 20 faizdən 60-80 faizədək artmış, DTK-da kök salmış, xalqımızın milli varlığına, layiqli yetirmələrinə qənim kəsilmiş erməni millətçilərinin əsrin əvvəlindən başlanmış bədnam fəaliyyətinə son qoyulmuşdur.
Dahi rəhbərin xalqımızın təkidli tələb və çağırışları ilə ikinci dəfə respublikamızın siyasi rəhbərliyinə qayıdışından sonrakı dövrdə müstəqil dövlətçiliyimizin bərqərar olması, milli-demokratik dövlət quruculuğu uğrunda apardığı çətin, gərgin, şərəfli mübarizəsində də vaxtilə onun bu sistemdə yaratdığı məktəbin milli ruhlu yetirmələri böyük öndərin sədaqətli yardımçıları olmuşlar.
Qürur hissi ilə vurğulanmışdır ki, bu ənənə indi də davam edir. Uzun müddətdən bəri vətəndaşlarımızın haqlı narahatlığına səbəb olmuş qətllər, adam oğurluğu cinayətləri törətmiş banda üzvlərinin ümummilli liderimizin siyasi xəttinin layiqli davamçısı Prezident İlham Əliyevin qəti göstəriş və tapşırığı ilə məhz Milli Təhlükəsizlik Nazirliyinin xüsusi əməliyyat-axtarış və istintaq qrupu tərəfindən aşkar edilib tutulması cəmiyyətdə MTN-in nüfuzunun, peşəkarlığının, Prezidentə, Ali baş komandana, Vətənə, dövlətə sədaqətinin əyani sübutuna çevrilmişdir.
Dövlətimizin ərazi bütövlüyünün müdafiəsi uğrunda döyüşlərdə nazirliyin onlarca əməkdaşının igidliklə vuruşduğu, onlardan 6 nəfərin Azərbaycanın Milli Qəhrəmanı adına layiq görüldüyü, son vaxtlar beynəlxalq terror təşkilatları ilə əlaqəsi sübuta yetirilmiş cinayətkar dəstələrin zərərsizləşdirildiyi, bir sıra terror-təxribat cəhdinin qarşısının alındığı da qeyd edilmişdir. Görülən tədbirlərin həm ictimaiyyət, həm də beynəlxalq təşkilatlar tərəfindən razılıqla qarşılandığı vurğulanmışdır.
Görüşdə xüsusi xidmət orqanlarının veteranları, rayon ictimaiyyətinin nümayəndələri nazirlik əməkdaşlarının hər birinin MTN-in 87 illiyini alnıaçıq, üzüağ qarşılamağa, əldə edilmiş uğurlarla öyünməyə tam haqqı olduğunu bildirmiş, onları peşə bayramları münasibətilə təbrik edərək, şərəfli işlərində uğurlar arzulamışlar. Təqdirəlayiq hal kimi, o da diqqətə çatdırılmışdır ki, son vaxtlar MTN öz fəaliyyətində aşkarlığa, xalqla ünsiyyətə xüsusi önəm verir. Nazirliyin strukturunda, kadrlarla işdə, maddi-texniki bazanın möhkəmlənməsində, müasir tələblərə cavab verən rabitə, informasiya texnologiyaları ilə təminat sahəsində görülən tədbirlərin əhəmiyyəti də qeyd olunmuşdur.
İctimaiyyətin nümayəndələri razılıq hissilə bildirmişlər ki, Azərbaycan Prezidenti İlham Əliyevin Sərəncamı ilə nazirliyin rəhbərliyində aparılmış kadr dəyişikliyi özünü tam doğrultmuş, qısa müddətdə bu qurumda əsaslı keyfiyyət dəyişikliyi baş vermişdir.
Görüşün respublikamızda ilk təhlükəsizlik orqanlarından birinin yaradıldığı, səmərəli fəaliyyət göstərdiyi, özünəməxsus müsbət ənənələrə malik Binəqədi rayonunda keçirilməsi də razılıq hissilə diqqətə çatdırılmışdır.
Görüşdə iştirak edən bir qrup xüsusi xidmət orqanları əməkdaşına xatirə hədiyyələri təqdim olunmuşdur.
Bölmənin digər xəbərləri
