“Azərbaycan təsviri sənəti: klassikadan postmodernizmə” – İncəsənət Muzeyində yeni ekspozisiya
Bakı, 1 oktyabr, AZƏRTAC
Azərbaycan Milli İncəsənət Muzeyində “Azərbaycan təsviri sənəti: klassikadan postmodernizmə” adlı yeni daimi ekspozisiyanın açılışı olub.
Bu barədə AZƏRTAC-a muzeydən bildirilib. Tədbirdə Milli İncəsənət Muzeyinin direktoru Əməkdar mədəniyyət işçisi Şirin Məlikova, Azərbaycan Rəssamlar İttifaqının sədri Xalq rəssamı Fərhad Xəlilov, Xalq rəssamı, akademik Ömər Eldarov və Azərbaycan Memarlar İttifaqının sədri Əməkdar memar Elbay Qasımzadə çıxış ediblər. Çıxışlarda ekspozisiyanın milli incəsənətimizin ötən əsrin 50-ci illərindən başlayaraq 2000-ci illərədək müxtəlif dövrlərini bir araya gətirməsi, rəssam və heykəltaraşların yaradıcılıq yolunun müəllifləri olduqları parlaq sənət nümunələri vasitəsilə təqdim etməsi baxımından xüsusi əhəmiyyət daşıdığı vurğulanıb.
Daha sonra tədbir iştirakçıları sərgi ilə tanış olublar. Ekspozisiyada ümumilikdə 80-dək rəngkarlıq, heykəltaraşlıq və eləcə də qrafika əsəri yer alıb.
Müxtəlif nəsillərə mənsub sənətkarların yaradıcılığını bir arada nümayiş etdirən ekspozisiya Azərbaycan təsviri sənətinin bütöv mənzərəsini yaradır. Burada həm XX əsrin əvvəllərində realizm üslubunda çalışan rəssamların sənət dünyası, həm də sonrakı dövrlərdə forma və ifadə vasitələrində yeni yanaşmalar ortaya qoyan modernistlərin axtarışları, eləcə də müasir dövrdə qlobal mövzulara müraciət edən rəssamların əsərləri təqdim edilərək tamaşaçıya milli rəssamlığımızın geniş üfüqlərini izləmək imkanı verir.
Tematika üzrə bölünmüş zallarda Bakının ecazkar mənzərələrini əks etdirən tablolar, görkəmli şəxsiyyətlərin psixoloji dərinliklə işlənmiş dolğun obrazları, gündəlik həyat səhnələrini canlandıran janr rəngkarlığı nümunələri və rənglə formanın fəlsəfi harmoniyasını ifadə edən mücərrəd əsərlər nümayiş olunur. Bütün bunlar Azərbaycan rəssamlıq məktəbinin həm klassik kökləri, həm də müasir axtarışlarını üzvi şəkildə birləşdirərək milli incəsənətin zənginliyini və dinamik inkişafını nümayiş etdirir.
Tağı Tağıyev, Qafar Seyfullayev, Vəcihə Səmədova, Bədurə Əfqanlı, Asəf Cəfərov, Bəyim Hacıyeva, Nadir Qasımov, Mirnadir Zeynalov, Fərhad Xəlilov, Çingiz Fərzəliyev, Salhab Məmmədov, Sirus Mirzəzadə, Aydan Salahova və digər qocaman və yeni dövr rəssamlarının əsərləri müxtəlif dövr və üslubları vahid bir məkan çərçivəsində təqdim etməklə XX əsr təsviri sənətinin dolğun mənzərəsini canlandırır.
Rəngkarlıq ekspozisiyasına Azərbaycan heykəltaraşlığının Cəlal Qaryağdı, Elmira Hüseynova, Natiq Əliyev, Sahib Quliyev, Teymur Rüstəmov kimi müxtəlif nəsilləri təmsil edən parlaq nümayəndələrinin klassik və abstrakt üslubda yaratdıqları əsərlər xüsusi dərinlik qatır. Burada ənənəvi realizmlə müasir plastik dil yanaşı təqdim olunaraq tamaşaçıya milli heykəltaraşlıq məktəbinin inkişaf xəttini izləmək imkanı yaradır. Nümayiş olunan plastika nümunələrində həm insan obrazlarının psixoloji zənginliyi, həm də forma və məkan münasibətlərinin yeni interpretasiyası diqqəti cəlb edir.
Bölmənin digər xəbərləri
