Azərbaycan Tibb Universitetində 20 Yanvar şəhidlərinin xatirəsi yad edilmişdir
Bakı, 17 yanvar (AZƏRTAC). Azərbaycan Tibb Universitetində (ATU) müəllim və tələbələrin iştirakı ilə 20 Yanvar faciəsinin iyirmi üçüncü ildönümünə həsr edilmiş tədbir keçirilmişdir.
AZƏRTAC xəbər verir ki, tədbirdə ATU-nun rektoru, akademik, Milli Məclisin deputatı Əhliman Əmiraslanov 1990-cı il yanvarın 19-dan 20-nə keçən gecə imperiya ordusunun Bakıda və Azərbaycanın digər şəhər və rayonlarında törətdikləri qanlı qırğınlardan, azadlıq arzusunda olan insanların qəddarcasına qətlə yetirilmələrindən söhbət açmışdır.
Rektor həmin vaxt xalqımızın dahi oğlu, ümummilli lider Heydər Əliyevin Azərbaycanın Moskvadakı daimi nümayəndəliyinə gələrək bu qanlı hadisəyə qarşı kəskin etirazını bildirdiyini xatırlatmışdır. Vurğulamışdır ki, 20 Yanvar hadisələrinə ilk dəfə hüquqi-siyasi qiymət məhz ulu öndər, müdrik şəxsiyyət Heydər Əliyevin təşəbbüsü ilə verilmişdir.
O dövrkü respublika rəhbərliyinin səriştəsizliyindən danışan Yeni Azərbaycan Partiyası Nəsimi rayon təşkilatının sədri, Milli Məclisin deputatı Məlahət İbrahimqızı Azərbaycanın haqq səsinin dünyaya çatdırılmasında xalqımızın əbədi lideri Heydər Əliyevin misilsiz xidmətlərini diqqətə çatdırmışdır.
Qanlı Yanvarın xalqımızın tarixinə qəhrəmanlıq salnaməsi kimi yazıldığını deyən M.İbrahimqızı bu tarixi səhifənin gənclərimizə hər zaman öyrədilməsinin vacibliyini bildirmişdir. O, 20 Yanvar faciəsi zamanı tibb işçilərinin xüsusi fədakarlıq göstərdiklərini qeyd etmişdir.
Digər çıxış edənlər də Qara Yanvarın qan yaddaşımıza əbədi həkk olunduğunu, şəhidlərin xatirəsinin heç zaman unudulmayacağını vurğulamışlar.
Bölmənin digər xəbərləri
