Azərbaycan-Türkiyə dostluğu daimi və sarsılmazdır
Bakı, 20 aprel, Ramiz Quliyev, AZƏRTAC
Azərbaycan və Türkiyə “Bir millət, iki dövlət” olaraq daim bir-birinin yanındadır. Qardaş xalqlarımızı əsrlər boyu qırılmaz dostluq və qardaşlıq əlaqələri birləşdirir. Türkiyədə baş verən güclü zəlzələdə Azərbaycanın fəal iştirakı bu münasibətlərin sarsılmaz və daimi olduğunun bariz nümunəsi idi.
AZƏRTAC xəbər verir ki, bu fikirləri AZƏRTAC-a Azərbaycan Memarlar İttifaqı İdarə Heyətinin sədri Elbay Qasımzadə deyib.
Memarlar İttifaqının rəsmisi qeyd edib ki, Türkiyədə baş verən dəhşətli zəlzələdə ilk dəstək göstərən, qardaş ölkənin yanında olan məhz Azərbaycan olub. Prezident İlham Əliyev zəlzələnin baş verdiyi gün çoxsaylı insan tələfatı və dağıntılarla bağlı Türkiyə Prezidenti Rəcəb Tayyib Ərdoğana, qardaş Türkiyə xalqına şəxsən öz adından və xalqımızın adından başsağlığı verib. Dövlətimizin başçısının tapşırığı ilə minədək xilasedici Türkiyəyə göndərilib. Azərbaycan xilasediciləri, o cümlədən tibb işçiləri zəlzələdən sonrakı dəhşətli fəsadların aradan qaldırılmasında fəal iştirak edərək bir çox insanların həyatını xilas ediblər. O cümlədən, zəlzələ nəticəsində xəsarət alanlara da yardım göstərilib, zəlzələ zonasına tibbi ləvazimatlar, zəruri avadanlıqlar, əşyalar və bütün şəraiti olan çadırlar göndərilib: “Danılmaz faktdır ki, 44 günlük Vətən müharibəsində Türkiyənin göstərdiyi siyasi dəstək Azərbaycanın haqq işinin qazanılmasında böyük rol oynadı. Hər zaman Azərbaycanın haqlı mövqeyini dəstəkləyən Türkiyə bu dəfə də dövlətimizin, xalqımızın çətin günündə öz mənəvi, siyasi dəstəyini və köməyini əsirgəmədi. Türkiyə kimi nəinki regionda, hətta dünyada güclü bir dövlətin Azərbaycanın mövqeyini dəstəkləməsi Vətən müharibəsində bizə çox böyük siyasi və mənəvi dəstək verməklə yanaşı, gücümüzü də xeyli artırmış oldu. Yeri gəlmişkən, müharibənin elə ilk günlərindən Türkiyə Prezidenti Rəcəb Tayyib Ərdoğanın Azərbaycanın bu ədalətli savaşında tək olmadığı barədə açıqlamaları da göstərdi ki, bizim Türkiyə kimi etibarlı tərəfdaşımız var. Xüsusilə vurğulamaq istəyirəm ki, 44 günlük müharibədə qazanılan Zəfər sayəsində dünya iki qardaş ölkənin bir-birinə necə bağlı olduğunun şahidi oldu”.
E.Qasımzadə həmçinin vurğulayıb ki, İkinci Qarabağ müharibəsində qazanılan tarixi Qələbə qardaş ölkələrin həm də hərbi-siyasi əməkdaşlığına, iqtisadi əlaqələrinə və diplomatik gücünə, Azərbaycan-Türkiyə amilinin möhkəmlənməsinə töhfə verdi. Azərbaycan Respublikasının Prezidenti İlham Əliyevin dediyi kimi, “Bu, bizim müştərək qələbəmizdir, Türkiyə-Azərbaycan birliyinin təsdiqidir. Bu gün bu birlik tarixdə, bəlkə də, ən yüksək səviyyədədir”.
Bundan başqa, Türkiyənin tanınmış şirkətləri işğaldan azad olunan ərazilərdə genişmiqyaslı bərpa-quruculuq işlərində yaxından iştirak edir. Qarabağın bərpası və quruculuq işlərində sayca ən çox iştirak edən də məhz türk şirkətləridir. Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın Füzuli və Zəngilan Beynəlxalq Hava limanlarının, digər mühüm obyektlərin açılışlarında birgə iştirakı işğaldan azad olunan ərazilərin tezliklə dirçəldilməsinə verilən böyük önəmin göstəricisidir.
Qeyd edək ki, bununla həm də dövlətlərimiz arasında iqtisadi əməkdaşlığın da inkişafına mühüm töhfələr verilib. Belə ki, Azərbaycandan Türkiyəyə 21 milyard dollar, Türkiyədən Azərbaycana 13,7 milyard dollar investisiya yatırılıb və ölkələrimiz arasında qarşılıqlı sərmayə yatırımları davam edir. Eyni zamanda, Azərbaycanda qeyri-neft sektoruna investisiya yatıran ölkələr sırasında Türkiyə birinci yerdədir.
“Azərbaycan ilə Türkiyə arasında müttəfiqlik münasibətləri haqqında Şuşa Bəyannaməsi”ndə siyasi, iqtisadi, ticari əlaqələr, mədəniyyət, təhsil, idman, enerji təhlükəsizliyi, Cənub Qaz Dəhlizi, müdafiə sənayesindəki əməkdaşlıq, hərbi əməkdaşlıq və qarşılıqlı hərbi yardım, Zəngəzur dəhlizi və digər mühüm məsələlər öz əksini tapıb.
Hər iki dövlət regionda və beynəlxalq aləmdə cərəyan edən hadisə və proseslərə münasibətdə eyni mövqedən çıxış edirlər. Qarşılıqlı səfərlər ikitərəfli əməkdaşlığın inkişafında əhəmiyyətli rol oynayır və bütün sahələrdə əlaqələr uğurla davam edir.
Bölmənin digər xəbərləri
