Bakı, 27 sentyabr, N.Məmmədova, AZƏRTAC

Təbii ki, Azərbaycanla Türkiyə arasında strateji tərəfdaşlıq üçüncü dövlətlərin əleyhinə yönəlməyib, bu əlaqələr regiondan kənarda olan güclərin bölgənin işlərinə müdaxilə etməsinə qarşı istiqamətlənib və beləliklə, İran, Rusiya, Gürcüstan və Ermənistanın maraqlarını qoruyur. Bu səbəbdən regionun bütün ölkələri Azərbaycan-Türkiyə əməkdaşlığını alqışlamalı, onun “3+3” formatı çərçivəsində (Azərbaycan, Gürcüstan, Ermənistan + Türkiyə, Rusiya, İran) genişlənməsi imkanlarına dəstək verməlidir.

Bu fikirləri AZƏRTAC-a müsahibəsində Türkiyənin tanınmış tarixçisi, M.Lomonosov adına Asiya və Afrika ölkələri İnstitutunun professoru Mehmet Perincek Qarabağda lokal xarakterli antiterror tədbirlərindən və bu bölgənin erməni sakinlərinin Azərbaycan cəmiyyətinə reinteqrasiyası prosesinin praktiki olaraq başlamasından sonra regionda yaranmış yeni reallıqlar fonunda Türkiyə Prezidenti Rəcəb Tayyib Ərdoğanın Naxçıvana səfərinin yekunlarını şərh edərkən söyləyib.

Ekspertin sözlərinə görə, Ankara ilə Bakı arasında əməkdaşlığın daha bir örnəyi İğdır-Naxçıvan boru kəmərinin təməlinin qoyulması olub. “Son illər enerji təhlükəsizliyinin qlobal müstəvidə, xüsusən Ukraynada müharibə fonunda əhəmiyyəti xeyli artıb. Ona görə də bu istiqamətdə atılan hər bir addım enerji təhlükəsizliyinin təmin edilməsinə kömək edəcək”, -deyən professor vurğulayıb ki, bu məsələdə region, həmçinin Türk dövlətlərinin Türkiyəyə enerji habına çevrilmək istiqamətində kömək üçün koordinasiyası mühüm amildir.

Azərbaycan Silahlı Qüvvələrinin Qarabağda keçirdiyi lokal xarakterli antiterror tədbirlərinin yekunundan danışan M.Perincek qeyd edib ki, mahiyyətcə, Azərbaycanın yeni qələbəsi Cənubi Qafqazda çoxdan gözlənilən sülhə yol açılması baxımından regionun bütün ölkələri üçün əhəmiyyətlidir.

Professor vurğulayıb: “İkinci Qarabağ müharibəsindən sonra Ermənistanın öz tarixindən dərs çıxaracağı və bir daha bəzi güclərin regiona münasibətdə hazırladığı imperialist planların xeyrinə hərəkət etməyəcəyi barədə ümidlər yaranmışdı, lakin onlar özünü doğrultmadı. İrəvan özünün təxribatçı siyasətini davam etdirdi və faktiki olaraq, Azərbaycanı antiterror tədbirləri keçirməyə məcbur etdi. Bu tədbirlər xarici güclərin regional məsələlərə müdaxiləsinin qarşısını aldı. İndi region ölkələri problemlərini öz aralarında, danışıqlar masası arxasında həll edə bilərlər”.

Türkiyəli tarixçi bildirib ki, faydalı olan “3+3” platforması Ermənistana regional təşəbbüslərə qoşulmağa, habelə onu daim öz qonşularına qarşı təhrik edən və “erməni xalqının obyektiv maraqlarına zərbə vuran xain havadarlarından” qurtulmağa imkan verəcək.

M.Perincek qeyd edib: “Regional inteqrasiyaya şərait yaradacaq yeni era açılır və bu, öz növbəsində, iqtisadi inkişafa kömək edəcək. Ankara, Bakı və Moskva ilə mehriban qonşuluq münasibətləri İrəvana özünün bütün problemlərini həll etməyə imkan verəcək. Ermənistanda başa düşməlidirlər ki, Türkiyə Rusiya və Azərbaycan Qərb üçün, xüsusilə ABŞ və Fransadan ötrü öz planlarının reallaşdırılması yolunda başlıca maneədir, çünki bu ölkələr qüdrətli orduya, təbii sərvətlərə, dövlətçilik ənənəsinə və böyük iqtisadi potensiala malikdir. Məhz bu səbəbdən Qərb həmin dövlətləri mühasirəyə almağa və boğmağa can atır. Ermənistan və ermənilər həmin planda bir alət, “qurbanlıq” kimi istifadə edilir və onların taleyi Qərbi qətiyyən maraqlandırmır. Regionda münasibətlərin normallaşması Qərbi öz regional siyasətinin bu mühüm alətindən məhrum edəcək. Faktiki olaraq, indi Qərb oyundan kənar vəziyyətdədir.