AZƏRBAYCAN VƏ RUSİYA YANACAQ-ENERGETİKA KOMPLEKSİ SAHƏSİNDƏ UĞURLA ƏMƏKDAŞLIQ EDİRLƏR
M.Kərimov respublikamızın yaxın qonşusu və tərəfdaşı olan Rusiya ilə əməkdaşlıq və qarşılıqlı fəaliyyətdən danışaraq dedi ki, biz bu ölkə ilə neft-qaz və elektrik energetikası sahəsində fəal əməkdaşlıq edirik. Bakı-Novorossiysk boru kəmərinin istismara verilməsi Azərbaycan neftinin dünya bazarına ixracı sahəsində ilk addım olmuşdur. Bununla əlaqədar 1996-cı ilin yanvarında Rusiya və Azərbaycan hökumətləri arasında saziş imzalanmışdır. Bu boru kəmərinin işləməsi və Azərbaycanın Xəzər neftinin Qara dənizə çıxması regional əməkdaşlığın genişləndiyinə əyani sübutdur. Rusiyanın “LUKoyl” neft şirkəti Azərbaycanın neft-qaz bazarında öz mövqelərini möhkəmləndirir. 2001-ci ildən başlayaraq Rusiya Azərbaycana təbii qaz göndərir. SSRİ-nin süqutuna baxmayaraq, Azərbaycanın energetika sistemi Rusiyanın energetika sistemi ilə paralel işləyir ki, bu da hər iki tərəf üçün sərfəlidir. Ölkələrimiz arasında elektrik enerjisi mübadiləsini artırmaq haqqında qərar qəbul olunmuşdur. Bundan ötrü ikinci 330 kilovoltluq elektrik xətti çəkmək nəzərdə tutulmuşdur. Bu, elektrik enerjisinin Azərbaycan ərazisi vasitəsilə tranzitini də həyata keçirməyə imkan verəcəkdir. Neft-qaz sahəsində Azərbaycan və Rusiya şirkətləri arasında qarşılıqlı sürətdə faydalı sıx əməkdaşlıq yaranmışdır, Rusiyanın onlarca sahibkarı və şirkəti Azərbaycan bazarında uğurla işləyir. Yüksək texnologiyalar haqqında informasiya mübadiləsi sahəsində və elmi-texniki sahədə də sıx qarşılıqlı fəaliyyət mövcuddur.
M.Kərimov bildirdi ki, Azərbaycan-Rusiya ikitərəfli əməkdaşlığının imkanları bununla bitmir. Məsələn, hökumətlərarası iqtisadi əməkdaşlıq komissiyasının qərarı ilə 2005-ci ildə Rusiyada Azərbaycan ili keçirilməsi üçün geniş tədbirlərdən ibarət proqram hazırlanır, 2006-cı il isə Azərbaycanda Rusiya ili elan edilmişdir. Bununla əlaqədar neft-qaz və elektroenergetika sahələrində əməkdaşlığın genişlənməsinə və dərinləşməsinə yönəldilmiş bir sıra tədbirlər keçirilməsi nəzərdə tutulmuşdur.
Respublikamızın neft-qaz sahəsinin dircəlişinə və inkişafına misilsiz töhfə verən ümummilli liderimiz Heydər Əliyev tərəfindən əsası qoyulan neft strategiyasına uyğun olaraq, artıq 10 ildir ki, Azərbaycan açıq qapı siyasəti aparır, xarici sərmayələri Xəzərin çox zəngin yataqlarının geniş miqyasda işlənilməsinə cəlb edir. Bu siyasət öz nəticələrini verir: 15 ölkəni təmsil edən 33 şirkətlə indiyədək 23 neft müqaviləsi imzalanmışdr. Bu müqavilələr üzrə sərmayələrin həcmi 60 milyard dollardır. “Əsrin müqaviləsi”nin həyata keçirilməsinə isə indiyədək 7 milyard dollar sərmayə qoyulmuşdur və bu proses davam edir.
Bölmənin digər xəbərləri
