Azərbaycan və Türkiyənin təmkinli, məsuliyyətli və rasional siyasəti diqqət çəkir ŞƏRH
Bakı, 14 iyul, AZƏRTAC
Prezident İlham Əliyevin IV Şuşa Qlobal Media Forumunun açılış mərasimində də vurğuladığı kimi, Azərbaycan ilə Türkiyə arasında dostluq, qardaşlıq, strateji tərəfdaşlıq və müttəfiqlik münasibətləri bütün istiqamətlər üzrə davam edir və daha da möhkəmlənir. Xüsusilə bölgəmizdə gərginliklərin, münaqişələrin və qeyri-sabitliyin hökm sürdüyü bir dövrdə iki ölkənin “Bir millət, iki dövlət” prinsipi əsasında nümayiş etdirdiyi həmrəylik və qarşılıqlı dəstək xüsusi əhəmiyyət daşıyır.
Bu sözləri AZƏRTAC-a açıqlamasında türk jurnalist Zəki Gümüş söyləyib.
O bildirib ki, Azərbaycan və Türkiyə liderləri — Prezident İlham Əliyev və Prezident Rəcəb Tayyib Ərdoğan bütün çıxışlarında iki dövlətin bir-birinə olan etimadını, strateji əməkdaşlığını və çiyin-çiyinə fəaliyyət göstərmək iradəsini dəfələrlə ifadə ediblər. Bu münasibətlər yalnız siyasi bəyanatlarla məhdudlaşmır, həm regional, həm də beynəlxalq məsələlərdə praktiki əməkdaşlıq formasında özünü göstərir.
"Müasir beynəlxalq münasibətlər sistemində dövlətlərarası əlaqələr, təbii ki, ilk növbədə, milli maraqlar və strateji hesablamalar üzərində qurulur. Lakin Azərbaycan-Türkiyə münasibətlərini fərqləndirən əsas xüsusiyyətlərdən biri də bu əlaqələrin strateji maraqlarla yanaşı, dərin tarixi, mədəni və mənəvi bağlara əsaslanmasıdır. İki ölkə arasında mövcud olan qarşılıqlı inam və həmrəylik bir çox məsələlərdə vahid mövqedən çıxış etməyə imkan verir.
Şuşanın bu münasibətlərdə xüsusi simvolik əhəmiyyəti var. Şuşa Azərbaycan xalqı üçün tarixi, mədəni və milli dəyəri böyük olan şəhərdir. Eyni zamanda, Türkiyə üçün də böyük mənəvi əhəmiyyət daşıyır. Prezident İlham Əliyevin məhz Şuşada Azərbaycan-Türkiyə münasibətlərinin əhəmiyyətini vurğulaması bu şəhərin yalnız coğrafi məkan deyil, həm də ortaq tarix və qardaşlıq rəmzi olduğunu göstərir", - deyə Z.Gümüş vurğulayıb.
Türk jurnalist deyib: "Bugünkü regional reallıqlara nəzər saldıqda görürük ki, Azərbaycan və Türkiyənin yerləşdiyi coğrafiyada ciddi təhlükəsizlik çağırışları mövcuddur. Ukrayna-Rusiya müharibəsi, Yaxın Şərqdə davam edən proseslər, müxtəlif regional gərginliklər və böyük güclər arasında rəqabət fonunda iki ölkənin koordinasiyalı şəkildə hərəkət etməsi xüsusi əhəmiyyət qazanır. Belə bir şəraitdə Azərbaycan və Türkiyənin sabitlik, təhlükəsizlik və əməkdaşlıq naminə nümayiş etdirdiyi ortaq yanaşma regionda balanslaşdırıcı amil kimi çıxış edir.
Xüsusilə mürəkkəb geosiyasi proseslər zamanı Azərbaycan və Türkiyənin təmkinli, məsuliyyətli və rasional siyasət yürütməsi diqqət çəkir. Hər iki ölkə qarşılaşdığı çağırışlara cavab verərkən emosional deyil, strateji yanaşma nümayiş etdirir. Qarşılıqlı məsləhətləşmələr və koordinasiya nəticəsində regional gərginliklərin daha da dərinləşməsinin qarşısının alınmasına mühüm töhfə verilir.
Dövlətlər daha çox bir çox məsələlərdə təkbaşına deyil, ittifaqlar və strateji tərəfdaşlıqlar çərçivəsində daha effektiv fəaliyyət göstərməyə üstünlük verirlər. Beynəlxalq təşkilatlarda, xüsusilə Birləşmiş Millətlər Təşkilatı kimi platformalarda ölkələrin qarşılıqlı dəstəyi onların mövqelərinin daha güclü şəkildə ifadə olunmasına imkan yaradır. Bu baxımdan Azərbaycan və Türkiyənin beynəlxalq arenada birgə fəaliyyət göstərməsi hər iki ölkənin maraqlarının qorunmasına xidmət edir".
O əlavə edib ki, Azərbaycan-Türkiyə münasibətlərinin əsas dayaqlarından biri də xalqlarımız arasındakı ortaq tarix, mədəniyyət və dəyərlərdir. Bu amillər siyasi və iqtisadi əməkdaşlığı daha da gücləndirir, iki ölkə arasında münasibətləri klassik dövlətlərarası əlaqələrdən daha yüksək səviyyəyə qaldırır.
Bölmənin digər xəbərləri
