Azərbaycan velosipedçisi dünya çempionatında iştirak hüququ qazanıb
Bakı, 28 fevral, AZƏRTAC
ABŞ-ın Los-Anceles şəhərində velosiped idmanının trek növü üzrə dünya kubokunun sonuncu - dördüncü mərhələsi başa çatıb.
AZƏRTAC xəbər verir ki, yarışda iştirak edən Azərbaycan yığmasının üzvü Sergey Omelçenko keyrin növündə 25 iştirakçı arasında 9-cu olub. Bu nəticə velosipedçimizə aktivinə 250 reytinq xalı yazmağa imkan verib.
Sergey Omelçenko bunadək dünya kubokunun birinci mərhələsində 80, ikinci və üçüncü mərhələlərin hər birində isə 175 xal qazanmışdı. Beləliklə, dünya kubokunun 4 mərhələsinin yekununa əsasən, velosipedçimiz 680 xalla bütün mərhələlərdə iştirak etmiş 42 velosipedçi arasında 13-cü olub ki, bu da ona apreldə Honkonqda keçiriləcək dünya çempionatının keyrin növündə iştirak hüququ verib. Beynəlxalq Velosipedçilər İttifaqının (UCİ) mövcud reqlamentinə əsasən, dünya çempionatında iştirak etmək üçün velosipedçilər dünya kubokunun mərhələ yarışlarında müvafiq reytinq xalları qazanmalıdır.
Bölmənin digər xəbərləri
