Azərbaycan Xalq Cümhuriyyətinin 96-cı ildönümü münasibətilə Gəncədə “İstiqlal parkı” istifadəyə verilmişdir
Gəncə, 28 may (AZƏRTAC, Sabir Əliyev). 28 may- Azərbaycan Xalq Cümhuriyyətinin 96-cı ildönümü günü Gəncədə daha bir istirahət mərkəzinin -“İstiqlal parki”nın açılışı olmuşdur.
“Gülüstan” yaşayış sahəsində istifadəyə verilən və ərazisi 5 hektar olan parkda sakinlərin istirahəti üçün hər bir şərait yaradılmışdır.
AZƏRTAC xəbər verir ki, tədbirdə Gəncə Şəhər İcra Hakimiyyətinin başçısı Elmar Vəliyev çıxış edərək Azərbaycan Xalq Cümhuriyyətinin fəaliyyət göstərdiyi 23 ay müddətində gördüyü böyük işlərdən danışmışdır.
Azərbaycan Xalq Cümhuriyyətinin ömrünün çox az olduğunu qeyd edən natiq demişdir ki, Azərbaycan yalnız ikinci dəfə, 1991-ci ildə həqiqi müstəqilliyinə qovuşmuşdur ki, bu da görkəmli dövlət xadimi Heydər Əliyevin uzaqgörən siyasəti nəticəsində mümkün olmuşdur. Ümummilli liderin ikinci dəfə siyasi hakimiyyətə gəlməsi xalqı bütün bəlalardan qurtararaq ağ günlərə çıxarmışdır. Ulu öndər Heydər Əliyevin başladığı böyük işlər Prezident İlham Əliyev tərəfindən uğurla davam etdirilir.
Mərasimdə Azərbaycan Milli Elmlər Akademiyasının Gəncə bölməsinin akademik katibi Fuad Əliyev, Gəncə Dövlət Universitetinin prorektoru Pərvin Kərimzadə və başqaları çıxış edərək 1991-ci ildə bərpa edilən müstəqilliyimizin ilk illərində yaranmış çətinliklərin, eləcə də həmin dövrdə hökm sürən anarxiya və özbaşınalıqların qarşısının alınmasında Heydər Əliyevin göstərdiyi misilsiz xidmətlərdən və bunun da sayəsində müstəqilliyimizin əbədi, daimi və dönməzliyinin təmin edilməsindən danışmışlar.
Sonra Heydər Əliyev parkındakı amfiteatrda böyük bayram konserti təşkil olmuşdur.
Bölmənin digər xəbərləri
