Azərbaycanda mövcud tolerantlıq ənənələri bütün Avropa üçün önəm kəsb edir
Bakı, 12 iyun (AZƏRTAC). İyunun 12-də Qafqaz Müsəlmanları İdarəsinin (QMİ) sədri şeyxülislam Allahşükür Paşazadə ATƏT-in Bakıda layihə əlaqələndiricisi Aleksis Şahtaxtinski ilə görüşmüşdür.
Qafqaz Müsəlmanları İdarəsindən AZƏRTAC-a bildirmişlər ki, görüşdə A.Paşazadə qonağa Azərbaycanda dövlət-din münasibətlərinin yüksək səviyyəsi, dini mənsubiyyətindən asılı olmayaraq bütün vətəndaşlar üçün yaradılan bərabər şərait, dini abidələrin tikinti və bərpa işlərinə dövlət səviyyəsində göstərilən qayğı barədə məlumat vermişdir. O, Qafqaz Müsəlmanları İdarəsinin Azərbaycanda, Qafqazda, habelə MDB miqyasında həyata keçirdiyi tədbirlər və layihələr barədə də danışmışdır.
A.Şahtaxtinski ATƏT-in tolerantlıqla bağlı layihələrinin olduğunu, bu baxımdan Azərbaycanda bu sahədə mövcud ənənələrin bütün Avropa üçün önəm kəsb etdiyini vurğulamışdır. O, yaxın gələcəkdə bu təcrübəni təşviq etmək məqsədi ilə birgə tədbirlər keçirmək niyyətində olduqlarını diqqətə çatdırmışdır. Bu cür tədbirlərin dünyada artması müşahidə olunan radikallıq meylləri ilə mübarizədə əhəmiyyətli olacağına əminliyini bildirən layihə əlaqələndiricisi əlavə etmişdir ki, tarixən tolerantlıq ənənələrinə malik və dövlət səviyyəsində multikulturalizm ideyalarını dəstəkləyən Azərbaycanın təcrübəsinin bütün dünyada təbliği vacibdir.
Görüşün sonunda A.Şahtaxtinskiyə QMİ-nin fəaliyyətini əks etdirən kitablar hədiyyə edilmişdir.
Bölmənin digər xəbərləri
