Azərbaycanda nikahların sayı 10 faiz artıb
Bakı, 19 may, AZƏRTAC
Azərbaycanda nikaha daxil olanların sayında artım var. Belə ki, dövlət qeydiyyatına alınan nikahların sayı 10 faiz artıb. Boşanmaların sayı isə qismən azalıb.
AZƏRTAC xəbər verir ki, bunu Ədliyyə Nazirliyinin Vətəndaşlıq vəziyyəti aktlarının reyestri xidmətinin rəisi Reyhanə Kərimova “Nikahın xitamı ilə bağlı ailə qanunvericiliyinin tətbiqi sahəsində mövcud vəziyyət” mövzusunda keçirilən konfransda bildirib.
Mediasiya proseslərində ailə mübahisələrinin üstünlük təşkil etdiyini vurğulayan Reyhanə Kərimova deyib: “Ədliyyə Nazirliyinin təşəbbüsü ilə ailə münasibətlərinin qorunması məqsədilə nikahın pozulması üçün qeydiyyat şöbələrinə müraciət edənlər psixoloq xidmətlərindən keçirlər. 2018-ci ildən təşkil olunan belə xidmətlər nəticəsində 7619 nikahın pozulması üçün qeydiyyat orqanlarına müraciət edən şəxslərdən 1300-dən çoxunun bu fikirdən daşınmasına nail olunub. Belə psixoloq xidmətləri Bakı şəhərinin qeydiyyat şöbələrini əhatə edir. Biz bunun əhatə dairəsini də genişləndirməyi düşünürük”.
Bölmənin digər xəbərləri
