AZƏRBAYCANIN 1:1000 000 MİQYASINDA XƏRİTƏLƏR ATLASI HAZIRLANMIŞDIR ATLAS 20 MİN ABŞ DOLLARINA SATILIR

AZƏRBAYCANIN 1:1000 000 MİQYASINDA XƏRİTƏLƏR ATLASI HAZIRLANMIŞDIR
ATLAS 20 MİN ABŞ DOLLARINA SATILIR

26.08.2004 [19:58]
Çap et
A⁺ A^-

Azərbaycan Milli Elmlər Akademiyası yer elmləri bölməsinin mətbuat xidmətindən AZƏRTAC-a bildirmişlər ki, Geologiya İnstitutu “Azərbaycanın litoloji, paleocoğrafi xəritələr atlası”nı hazırlayıb. Atlas, devon dövründən (417 milyon il bundan əvvəl) indiyə qədər olan bir zamanı əhatə edir. Geoloqların 50 il müddətində apardığı tədqiqatların, elmi işlərin əsasında hazırlanmış atlasda Azərbaycanın qədim coğrafiyası, geologiyası, faydalı qazıntılar, zəlzələ, sürüşmə, sel, daşqın, palçıq vulkanı, maqmatik vulkan, neft ehtiyatları və s. öz əksini tapıb. Bu nadir xəritələr toplusu vasitəsilə Azərbaycan ərazisinin geoloji inkişaf tarixini izləmək, hətta hansı ərazilərin qədimdə quru və ya su ilə örtülü olduğunu bilmək, o cümlədən neftlilik və qazlılıq barədə məlumat almaq mümkündür. Burada neftimizin 7-8 milyon illik tarixi əks olunub. Bu mənada atlas neft axtarışı üçün olduqca qiymətli vəsaitdir.

Atlasın tərtibində Geologiya İnstitutu ilə birgə Coğrafiya İnstitutunun, Ekologiya və Təbii Sərvətlər Nazirliyinin, Dövlət Neft Şirkətinin, Elmi Tədqiqat Geofizika İnstitutunun, Bakı Dövlət Universitetinin alimləri və mütəxəssisləri yaxından iştirak etmişlər. Geologiya İnstitutunun daxili imkanları hesabına hazırlanmış atlas 44 rəngli xəritədən ibarətdir və 1:1000 000 miqyasındadır. Ölçüsü isə 70x50 santimetrdir. Atlas 20 min ABŞ dollarına satılır.

Xatırladaq ki, Geologiya İnstitutu Mərkəzi Avrasiyanın xəritələr atlasının hazırlanmasına dair həyata keçirilən və 12 ölkənin iştirak etdiyi beynəlxalq layihədə ölkəmizi təmsil edir. Qazaxıstanın həyata keçirdiyi həmin layihə ilə əlaqədar olaraq Azərbaycanın xəritələr atlasının faydalı qazıntılara dair hissəsi bu ilin sonunadək Almatıya göndəriləcəkdir.