Azərbaycanın Fransadakı səfirliyi prezident seçkilərinə tam hazırdır
Paris, 29 mart, AZƏRTAC
Aprelin 11-də Azərbaycanda keçiriləcək prezident seçkilərində Fransada yaşayan vətəndaşlarımızın səs verməsinin təmin edilməsi məqsədilə Parisdəki səfirliyimizdə qanunvericiliklə nəzərdə tutulmuş qaydada tədbirlər görülür.
Səfirlikdən AZƏRTAC-a bildirilib ki, konsulluq qeydiyyatında olan və aktiv seçki hüququna malik 320 Azərbaycan vətəndaşının adı seçici siyahısına daxil edilib, həmin siyahı təsdiq olunmaq üçün Mərkəzi Seçki Komissiyasına göndərilib.
Müvafiq seçki dairəsi üzrə səfirliyin Mədəniyyət Mərkəzində seçki məntəqəsi yaradılıb, məntəqə seçki komissiyasının iclası keçirilərək komissiyanın üzvləri, həmçinin sədri və katibləri müəyyənləşib.
Fransada yaşayan, seçici siyahısına daxil edilmiş vətəndaşlarımız seçkilərdə iştirak etməyə dəvət olunublar. Bununla yanaşı, səsvermə günü Fransada ezamiyyətdə olan Azərbaycan vətəndaşları da səfirliyə gələrək səsvermədə iştirak edə biləcəklər.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
