AZƏRBAYCANIN GİMNAST QIZLARI MOSKVADA QƏNAƏTBƏXŞ ÇIXIŞ ETMİŞLƏR
Azərbaycanın gimnast qızları “Qazprom”un Kuboku uğrunda Moskva Qran-pri yarışlarında qənaətbəxş çıxış etmişlər. Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, “Neftçi” klubunun nümayəndəsi Anna Qurbanova 84,682 bal toplayaraq, 45 idmançı arasında 19-çu yeri tutmuşdur. Bu, 18 yaşlı idmançının beynəlxalq miqyaslı yarışlarda ilk çıxışı olmasına baxmayaraq, o, Rusiyanın 4 gimnastını qabaqlamışdır. İkinci gimnastımız – builki Bakı çempionu Valeriya Yeqay (“Neftçi” gimnastika məktəbi) turnirin reqlamentinə görə müsabiqədənkənar çıxış edirdi. Valeriya 72,032 balla 32-ci yeri tutmuşdur.
Qeyd edək ki, bu ayın axırına nəzərdə tutulmuş Azərbaycan çempionatı və gələn ayın əvvəlində Ulyanovskda və Riqada keçiriləcək beynəlxalq turnirlər Dünya Kuboku uğrunda yarışların aprelin 23-25-də Bakıda keçiriləcək növbəti mərhələsinə hazırlaşan gimnastlarımız üçün növbəti sınaq olacaqdır.
Bölmənin digər xəbərləri
