AZƏRBAYCANIN HƏNDBOL ÜZRƏ YIĞMA KOMANDASI BEYNƏLXALQTURNİRİN FİNALINA ÇIXMIŞDIR
AZƏRTAC xəbər verir ki, Azərbaycanın həndbol üzrə qadınlardan ibarət yığma komandası Rusiyanın Zveniqorod şəhərində Moskva vilayəti Həndbol Federasiyasının kuboku uğrunda keçirilən II beynəlxalq turnirin finalına çıxmışdır. İlk görüşdə “Rostov-Don” (Rostov, Rusiya) komandası üzərində 20:19 hesabı ilə qələbə qazanan Azərbaycan həndbolçuları, sonra Ukraynanın “Motor” (Zaporojye) klubunu 26:15, Moskvanın “Luç” komandasını isə 20:19 hesabı ilə məğlub etmişdir. Dörddəbir finalda Zveniqorodun “Zvezda-2” kollektivi ilə qarşılaşan bakılılar 19:12 hesabı ilə qalib gələrək yarımfinala çıxmışlar. Bu mərhələdə yenidən Moskvanın “Luç” kolletivi ilə qarşılaşan Azərbaycan həndbolçuları gərgin keçən görüşdə rəqibini 31:30 hesabı ilə məğlub edərək finalda oynamaq hüququ qazanmışlar.
Qızıl medallar uğrunda noyabrın 7-də keçiriləcək qarşılaşmada Georgi Voroninin başçılıq etdiyi Azərbaycan yığmasının rəqibi Belarus millisi ilə “Zvezda” klubu arasındakı görüşün qalibi olacaqdır.
Bölmənin digər xəbərləri
