Azərbaycanın internet məkanında “Raund” adlı veriliş yayıma başlayıb
Bakı, 20 avqust, AZƏRTAC
Azərbaycanın internet məkanında “Raund” adlı veriliş yayıma başlayıb.
AZƏRTAC xəbər verir ki, Azərbaycan Peşəkar Boks Federasiyasının dəstəyi ilə hazırlanan proqram “YouTube” internet platforması vasitəsilə yayımlanır. Ölkəmizdə peşəkar boksa həsr olunmuş ilk və yeganə şou olan “Raund” layihəsi standart idman verilişlərindən fərqlənir. Boks tariximizin əfsanələrinin iştirak etdikləri verilişdə tamaşaçılara peşəkar boks haqqında məlumatlar çatdırılır, idmançılarımızın fərqli cəhətləri təqdim olunur. Eyni zamanda, həm maarifləndirici, həm də əyləncəvi funksiyaları öz üzərinə götürən layihə peşəkar komanda tərəfindən həyata keçirilir. Veriliş Zaur Mirzəzadənin təqdimatında yayımlanır.
Artıq “Raund” verilişinin ilk buraxılışı internet istifadəçilərinin ixtiyarına verilib. “YouTube” sosial platformasında “Baku Fight Lab” kanalında nümayiş olunan verilişin qonaqları Azərbaycanın müasir idman tarixinin parlaq simaları, Peşəkar Boks Federasiyasının vitse-prezidentləri, boks üzrə gənclər arasında ilk dünya çempionu Fərhad Acalov, idmançılarımızı dünya arenasına çıxaran ilk və yeganə promouter Ziya Əliyev olublar. Proqramda ölkəmizdə peşəkar boksun yaranma və inkişaf tarixi, Azərbaycan boksunun dünya idman məkanına inteqrasiyası, mövcud problemlər, inkişaf perspektivləri müzakirə olunub.
Verilişə https://www.youtube.com/watch?v=F6e_GfetKE4&feature=youtu.be linki vasitəsilə baxmaq mümkündür.
Bölmənin digər xəbərləri
