AZƏRBAYCANIN KOSOVO MƏSƏLƏSİ İLƏ BAĞLI MÖVQEYİNƏ YENİDƏN BAXILMASI MƏNTİQİDİR
Kosovoda vəziyyət kəskin şəkildə dəyişmişdir. NATO və tərəfdaş ölkələrə Kosovoda sülhməramlı əməliyyat keçirilməsi üçün mandat verən BMT Təhlükəsizlik Şurasının 1244 nömrəli qətnaməsi müəyyən dərəcədə pozulmuşdur. Artıq bu qətnamə qəbul edilərkən hökm sürən şərait mövcud deyildir. Ona görə də Azərbaycanın bu məsələyə dair mövqeyinə yenidən baxılması məntiqidir.
AZƏRTAC xəbər verir ki, bu sözləri Azərbaycan xarici işlər nazirinin müavini Araz Əzimov demişdir.
Azərbaycanın öz sülhməramlılarını Kosovodan çıxarmağa hazırlaşmasına münasibət bildirən A.Əzimov rəsmi Bakının bütün mövqeləri, maraqları tam dəqiqləşdirdikdən sonra qərar qəbul edəcəyini söyləmişdir. A.Əzimov demişdir ki, Azərbaycan heç də NATO ilə əlaqələrinin səviyyəsini aşağı salmır və qarşılıqlı münasibətləri eyni ruhda, eyni əsaslarda davam etdirmək niyyətindədir. Əfqanıstanda sülhməramlı əməliyyatlarda iştirak edən Azərbaycan hərbçilərinin sayı bu yaxınlarda iki dəfə artırılmışdır.
Bölmənin digər xəbərləri
