Azərbaycanın Mərkəzi Asiya ilə əlaqələri yeni inkişaf mərhələsinə yüksəlir - ŞƏRH
Bakı, 2 sentyabr, AZƏRTAC
Azərbaycanın Mərkəzi Asiya ölkələri ilə əlaqələrinin inkişafı bugünkü reallıqlarda özünün aydın ifadəsini tapır. Prezident İlham Əliyevin bu günlərdə Şanxay Əməkdaşlıq Təşkilatının tədbirlərində iştirak etmək məqsədilə Qırğız Respublikasına işgüzar səfəri də bu baxımdan xüsusi əhəmiyyət daşıyır. Səfər Azərbaycan-Qırğızıstan münasibətlərinin müttəfiqlik səviyyəsinə yüksəlməsi ilə yanaşı, ölkəmizin Mərkəzi Asiya ilə Cənubi Qafqaz arasında siyasi, iqtisadi və nəqliyyat əlaqələrinin gücləndirilməsində mühüm rolunu bir daha təsdiqləyib. Səfər çərçivəsində dövlətimizin başçısının keçirdiyi ikitərəfli görüşlər və aparılan müzakirələr Azərbaycanın Mərkəzi Asiya dövlətləri ilə münasibətlərinin dinamikasını, eləcə də ölkəmizin regionda və beynəlxalq müstəvidə fəal diplomatik mövqeyini nümayiş etdirib.
Bu fikirləri AZƏRTAC-a açıqlamasında Milli Məclisin deputatı Malik Həsənov söyləyib. Deputat bildirib ki, Azərbaycanın xarici siyasətinin əsas istiqamətlərindən biri regional və beynəlxalq təşkilatlar çərçivəsində əlaqələrin qurulması və dövrün çağırışlarına uyğun olaraq inkişaf etdirilməsidir. Hazırda bu istiqamətdə ölkəmizin əldə etdiyi uğurlar davamlı xarakter daşıyır. Bu baxımdan Azərbaycan-Şanxay Əməkdaşlıq Təşkilatı əlaqələri də uğurla inkişaf edir.
“Azərbaycanın Avrasiya məkanında mühüm tranzit ölkəyə çevrilməsi, Şimal-Cənub və Şərq-Qərb nəqliyyat dəhlizlərinin qovşağında yerləşməsi, eləcə də müasir nəqliyyat infrastrukturu ölkəmizin ŞƏT üçün əhəmiyyətini daha da artırır. Təşkilatda dialoq tərəfdaşı statusuna malik olan Azərbaycan üçün yenidən formalaşan dünya nizamında mövqeyini daha da möhkəmləndirmək baxımından geniş imkanlar yaranır. Qırğız Respublikasının paytaxtı Bişkek şəhərində “ŞƏT plyus” formatında keçirilən görüşdə müzakirəyə çıxarılan “ŞƏT-in 25 ili: davamlı sülh, inkişaf və rifah naminə birlikdə” mövzusu da təşkilatın qarşısında duran prioritetləri və çağırışları özündə əks etdirib”, - deyə müsahibimiz bildirib.
Deputat Azərbaycanın beynəlxalq münasibətlər sistemində artan rolunu şərtləndirən amillərə də diqqət çəkib. O deyib: “Ölkəmiz hazırda dünyaya təqdim etdiyi sülh modeli ilə diqqət mərkəzindədir. Dövlətimizin başçısı çıxışlarında vurğuladığı kimi, işğala, etnik təmizləməyə və soyqırımına məruz qalmış, suverenliyini və ərazi bütövlüyünü güc tətbiqi ilə bərpa etmiş, daha sonra isə məğlub olmuş düşmənə sülh təklif etmiş ölkə kimi təcrübəmiz beynəlxalq ictimaiyyətlə paylaşa biləcəyimiz nadir nümunədir. Ermənistanla sülh yalnız kağız üzərində əldə edilməyib. Sülh sazişi paraflanıb və birgə bəyanat qəbul olunub. Artıq real həyatda da sülh təmin edilib.
Azərbaycanın regionda dayanıqlı sülhə və təhlükəsizliyə verdiyi davamlı töhfələr beynəlxalq səviyyədə dəstəklənir. Təbii ki, bu amil yeni əməkdaşlıq formatlarının yaradılmasına və iqtisadi inkişaf üçün geniş imkanların açılmasına şərait yaradır. Azərbaycan atdığı real addımlarla əməkdaşlıq məkanı kimi qazandığı mövqeyi daha da möhkəmləndirir.
Ölkəmiz çoxtərəfliliyin tərəfdarıdır. Azərbaycan qlobal problemlərin həllində birlik və həmrəyliyə çağırışlarını, eləcə də bu məqsədlərə nail olmaq üçün göstərdiyi səyləri ilə öz mövqeyini nümayiş etdirir. Əlaqələrin inkişafında ölkəmizin coğrafi mövqeyi də xüsusi əhəmiyyət daşıyır. Şərqlə Qərbin qovşağında yerləşən Azərbaycan ölkələri və xalqları birləşdirən mühüm bağlantı rolunu oynayır. Qazanılan uğurlar ölkəmizin malik olduğu imkanlara, ədalətə və beynəlxalq hüquqa əsaslanan siyasətinə söykənir”.
Malik Həsənov qeyd edib ki, Prezident İlham Əliyevin dörd il ərzində Qoşulmama Hərəkatına rəhbərlik etmiş Azərbaycanın bundan sonra da beynəlxalq məsələlərdə çoxtərəflilik prinsiplərinin möhkəmləndirilməsinə töhfə verəcəyini bildirməsi ölkəmizin qlobal gündəmdə öz mövqeyini fəal şəkildə müdafiə etmək əzmini bir daha təsdiqləyir.
Bölmənin digər xəbərləri
