Azərbaycanın Müstəqillik Günü Varşavada qeyd olunub VİDEO
Vyana, 26 may, AZƏRTAC
Azərbaycanın Müstəqillik Gününün 107-ci ildönümü münasibətilə ölkəmizin Polşadakı səfirliyi tərəfindən Varşavada məşhur Bristol mehmanxanasında rəsmi qəbul keçirilib. Tədbir məkanının ilk sahibinin Paris Sülh Konfransında Azərbaycan diplomatları ilə görüşən Polşa nümayəndə heyətinin rəhbəri İqnasi Yan Paderevskinin olması rəsmi qəbulun təqdimatı baxımından rəmzi mahiyyət daşıyıb.
AZƏRTAC xəbər verir ki, qəbulda Polşanın xarici işlər nazirinin müavini xanım Anna Radvan-Rörenşef, Polşa seyminin vitse-marşalı, nazir müavinləri, baş prokuror və sərhəd xidməti rəisinin müavinləri, hökumət, seym və senatın üzvləri, dövlət qurumlarının təmsilçiləri, universitet rektorları, Polşada akkreditə olunmuş diplomatik missiyaların rəhbərləri, Azərbaycan diasporunun nümayəndələri, Polşa vətəndaşı olan həmvətənlərimiz və digərləri iştirak ediblər.
Əvvəlcə Frederik Şopen adına Musiqi Universitetinin tələbəsi, Rudolf Petrak Beynəlxalq Vokal Müsabiqəsinin qalibi Konstança Molevska tərəfindən Azərbaycan Respublikası və Polşa Respublikasının Dövlət himnləri səsləndirilib.
Azərbaycanın Polşadakı səfiri Nərgiz Qurbanova Azərbaycan Xalq Cümhuriyyətinin (AXC) yaradılmasından danışıb, 1918-ci il mayın 28-də bütün Türk və müsəlman dünyasında AXC-nin ilk demokratik dövlət kimi qurulduğunu qeyd edib. Səfir bildirib ki, AXC-nin parlamenti qəbul etdiyi 230-dan artıq qanun və qərarla dövlət institutlarının qurulması, ölkənin müstəqilliyi və ərazi bütövlüyünün qorunması, əsas insan hüquq və azadlıqlarının təmin edilməsi, qanunun aliliyi və səmərəli məhkəmə sisteminə əsaslanan dünyəvi demokratik dövlətin formalaşdırılması istiqamətində ciddi işlər görüb. Etnik və dini mənsubiyyətindən asılı olmayaraq bütün vətəndaşlarına səsvermə hüququ verən AXC qadınlara kişilərlə bərabər siyasi və seçki hüququ təmin ilk dövlətlərdən olub. Polşa AXC-ni tanıyan 23 dövlətdən biri olub. 1919-cu ilədək 16 dövlətin, o cümlədən Polşanın Azərbaycanda diplomatik nümayəndəliyi yaradılıb.
Səfir, eyni zamanda, AXC-nin müxtəlif strukturlarında xidmət etmiş polyakəsilli dövlət xadimlərini xatırlayıb. Qeyd olunub ki, Cümhuriyyətin Xarici İşlər Nazirliyi Katibliyinin rəhbəri Meçıslav Rudjinski, İnformasiya Bürosunun əməkdaşı Aqqe Kşıkovski, kartoqraf Pavel Koqnovitski, həmçinin Paris Sülh Konfransında Azərbaycan nümayəndə heyətində təmsil olunmuş Vitold Marçevski polyakəsilli olublar. AXC-nin xarici işlər naziri Məmməd Yusif Cəfərovun həyat yoldaşı Katarjina (Yekaterina) Puxarskanın polşalı əsilzadə ailəsindən olduğu vurğulanıb. AXC-yə güclü dəstəyin əlaməti olaraq Titus Filipoviçin başçılıq etdiyi Polşa nümayəndə heyətinin bolşevik işğalından, sadəcə, dörd gün əvvəl – 1920-ci il aprelin 24-də Bakıda olduğu diqqətə çatdırılıb.
N.Qurbanova daha sonra qeyd edib ki, Azərbaycanın müstəqilliyinin elan olunmasından 107 il, müstəqilliyinin bərpa olunmasından isə 34 il ötür. Bu gün Prezident İlham Əliyevin rəhbərliyi ilə həyata keçirilən milli maraqlara söykənən praqmatik daxili və xarici siyasətin əsasında məhz Azərbaycan xalqının tarixi nailiyyəti olan dövlət müstəqilliyinin qorunması və möhkəmləndirilməsi dayanır. Azərbaycanın həyata keçirdiyi siyasətin təkcə ölkəmizi deyil, bütün regionu dəyişdiyi, dövlətimizin tarixdə heç vaxt olmadığı qədər güclü olduğu vurğulanıb. Həmçinin Ermənistanın uzun illər davam edən işğalına soy qoyulduğu, torpaqlarımızın azad edildiyi bildirilib, regionda sülh, təhlükəsizlik və tərəqqi üçün tarixi fürsətin yarandığı diqqətə çatdırılıb.
Eyni zamanda qeyd olunub ki, Azərbaycan Respublikası Konstitusiyanın qəbulunun 30-cu ildönümü və ölkənin suverenliyi və ərazi bütövlüyünün bərpasının 5 illiyi münasibətilə 2025-ci il Azərbaycanda “Konstitusiya və Suverenlik İli” elan olunub.
Çıxışının sonunda səfir Polşa ilə mövcud olan yüksəksəviyyəli ikitərəfli əlaqələrdən də danışıb.
Fəxri qonaq qismində çıxış edən Polşanın xarici işlər nazirinin müavini xanım Anna Radvan-Rörenşef nazir Radoslav Şikorskinin təbriklərini çatdırıb. O, münasibətlərin tarixinə nəzər salaraq qeyd edib ki, Polşa Azərbaycanın müstəqilliyini tanıyan və onunla diplomatik əlaqələr quran ilk dövlətlərdən olub. Rəsmi qəbulun ümumi tariximizi əks etdirməklə yanaşı, Polşa ilə Azərbaycan arasında güclü dostluğu və gələcəyə hesablanmış tərəfdaşlığı bir daha təsdiqlədiyini söyləyib. Əlavə edib ki, Varşava logistika, təhsil və enerji sahələri də daxil olmaqla, müxtəlif istiqamətlərdə əməkdaşlığın genişləndirilməsində böyük potensial görür. Orta Dəhlizin inkişafı iqtisadi inteqrasiya üçün yeni imkanlar açır və Polşa Azərbaycanın strateji rolunu dəstəkləyir.
Nazir müavini, habelə Cənubi Qafqazda sülh prosesi ilə bağlı son nailiyyətləri alqışladıqlarını vurğulayıb. Polşanın Azərbaycanı təkcə etibarlı dost kimi deyil, həm də təhlükəsiz, sabit və firavan regionun qurulmasında mühüm tərəfdaş kimi gördüyünü qeyd edən A.Radvan-Rörenşef sonda milli bayram münasibətilə Polşa xalqı adından təbriklərini bir daha ifadə edib.
Polşada səfərdə olan Qazaxıstanın Baş nazirinin müavini, xarici işlər naziri Murat Nurtleu da rəsmi qəbula təşrif buyurub, xoş arzularını və təbriklərini çatdırıb.
Bölmənin digər xəbərləri
