Azərbaycanın müstəqilliyi uğrunda canlarından keçən oğul və qızlarımızın xatirəsi qəlbimizdə daim yaşayacaqdır
Bakı, 21 yanvar (AZƏRTAC). Azərbaycan Milli Elmlər Akademiyasının Eroziya və Suvarma İnstitutunda 20 Yanvar faciəsinin 24-cü ildönümünə həsr olunmuş tədbir keçirilmişdir
Akademiyadan AZƏRTAC-a bildirmişlər ki, əvvəlcə faciə qurbanlarının xatirəsi bir dəqiqəlik sükutla yad edilmişdir.
İclasda institutun direktoru, aqrar elmlər üzrə fəlsəfə doktoru Seymur Səfərli çıxış edərək bildirmişdir ki, 20 Yanvar hadisələri xalqımızın yaddaşına qanlı faciə kimi daxil olsa da, bütövlükdə milli tariximizin ən şanlı və qəhrəmanlıq səhifələrindən biridir. Görünməmiş qəddarlıqla həyata keçirilmiş qanlı cinayət nəticəsində 147 nəfər günahsız insan öldürülmüş, 700-dən artıq adam yaralanmış və 800-dən çox soydaşımız qanunsuz həbs olunmuşdur.
Diqqətə çatdırılmışdır ki, 20 Yanvar hadisələrinə ilk siyasi -hüquqi qiymət ümummilli lider Heydər Əliyev tərəfindən verilmiş, Ulu Öndərin təşəbbüsü ilə şəhidlərimizin qəhrəmanlığını əbədiləşdirmək məqsədi ilə Şəhidlər xiyabanında “Əbədi məşəl” abidə-kompleksi də tikilmişdir.
Qeyd edilmişdir ki, 20 Yanvar şəhidləri gələcək nəsillərimiz üçün bir örnəkdir. Azərbaycanın müstəqilliyi uğrunda canlarından keçən oğul və qızlarımızın xatirəsi qəlbimizdə daim yaşayacaqdır.
Tədbirdə çıxış edənlər keçmiş sovet imperiyasının xalqımızın başına gətirdiyi müsibətlərdən və Azərbaycanın müstəqilliyi uğrunda mübarizəyə qalxmış igid oğul və qızlarımızın qəhrəmanlıqlarından söhbət açmışlar.
Bölmənin digər xəbərləri
