Azərbaycanın Polşadakı səfirliyi Ukrayna ilə sərhəddəki vəziyyətə dair məlumat yayıb
Bakı, 2 mart, AZƏRTAC
Ukraynadakı vəziyyətlə əlaqədar Azərbaycan Respublikasının vətəndaşlarından Polşanın Ukrayna ilə sərhəd-keçid məntəqəsini keçdikdən sonra Polşa tərəfindən təklif edilən istiqamət üzrə hərəkət edən təxliyə avtobuslarına minmələri xahiş olunur.
AZƏRTAC xəbər verir ki, bu barədə Azərbaycan Respublikasının Polşa Respublikasındakı səfirliyinin məlumatında qeyd olunub.
Bildirilib ki, avtobuslar müxtəlif şəhərlərdə yerləşən qəbul məntəqələrinə hərəkət edir. Vətəndaşlarımız həmin qəbul məntəqələrində yerləşdirildikdən dərhal sonra Azərbaycan Respublikasının Polşadakı səfirliyinin 0048576900183 saylı qaynar xəttinə bağlı vatsap nömrəsinə yaxud [email protected] elektron poçt ünvanına aşağıdakı məlumatı göndərməlidirlər:
1) Pasportun (olmadığı təqdirdə şəxsiyyətini təsdiq edən istənilən sənədin) surəti (fotoşəkli);
2) Hazırda yerləşdirildiyi ünvan;
3) Telefon nömrəsi (və olduğu təqdirdə vatsap nömrəsi);
4) Azərbaycanda yaxın qohumunun ünvanı və telefon nömrəsi
Həmin məlumatlar əsasında vətəndaşlarımız siyahıya alınacaq və onlar üçün Polşadan Azərbaycana təxliyə uçuşları təşkil olunacaq. Təhlükəsizlik şərtlərini nəzərə alaraq, təxliyə təyyarəsinə yalnız adları səfirliyin siyahısında olan şəxslər buraxılır. Təxliyə zamanı, ilk növbədə, qadınlara, uşaqlı valideynlərə, yaşlılara və tələbələrə üstünlük verilir. Digər kateqoriyadan olan vətəndaşlar növbəyə alınır.
Bölmənin digər xəbərləri
