AZƏRBAYCANIN TAEKVONDO ÜZRƏ KİŞİLƏRDƏN İBARƏT YIĞMASI AVROPA BİRİNCİLİYİNDƏ İKİNCİ YERİ TUTMUŞDUR
AZƏRTAC xəbər verir ki, oktyabrın 28-də Heydər Əliyev adına İdman - Konsert Kompleksində oğlan və qızlar arasında taekvondo üzrə Avropa birinciliyi başa çatmışdır. Yarışda 38 ölkədən 365 idmançı mübarizə aparmışdır.
Qitə birinciliyinin sonuncu günü daha bir Azərbaycan idmançısı- Aydın Bəhməlov (78 kq-dan yuxarı) bürünc medala layiq görülmüşdür.
Xatırladaq ki, əvvəlki günlərdə Eldar Qurbanov (48 kq), Səbuhi İsmayılzadə (68 kq) qızıl, Nicat Mikayılzadə (59 kq) ilə Reyhan Bağırova (44 kq) bürünc medala layiq görülmüşdülər.
Beləliklə, bu nəticə ilə Azərbaycanın kişilərdən ibarət yığması ümumi komanda hesabında yalnız İngiltərə millisini irəli buraxaraq ikinci yeri tutmuşdur. Fransa yığması isə üçüncü olmuşdur. Həm oğlan, həm qızların ümumi komanda hesabında isə Fransa yığması fəxri kürsünün ən yüksək pilləsinə qalxmışdır. İngiltərə ikinci, Xorvatiya komandası isə üçüncü yeri tutmuşdur.
Bölmənin digər xəbərləri
