Azərbaycanın Ukraynadakı səfirliyi və Xarkovdakı fəxri konsulluğu gücləndirilmiş iş rejimində çalışır
Kiyev, 24 fevral, AZƏRTAC
Azərbaycanın Ukraynadakı səfirliyi bu ölkədə yaşayan soydaşlarımızın problemlərinin həlli üçün gücləndirilmiş iş rejimində fəaliyyət göstərir.
Bu barədə AZƏRTAC-a səfirlikdən məlumat verilib.
Səfirlik soydaşlarımızı təhlükəsizlik baxımdan evdən çıxmamağa çağırıb və bildirib ki, ehtiyac yarandığı halda səfirliyin 00380735050000 nömrəli qaynar xəttinə zəng edə bilərlər. Ukrayna hava yollarını bağladığı üçün hələlik ölkədən çıxış mümkünsüzdür.
Azərbaycanın Xarkovdakı fəxri konsulluğundan isə AZƏRTAC-a bildiriblər ki, Xarkov şəhəri ətrafında vəziyyət gərgin olaraq qalır.
“Soydaşlarımız və vətəndaşlarımız üçün ən təhlükəsiz yer evləridir. Problemlərin həllinə yardım göstərmək üçün konsulluğun qaynar xətti fəaliyyət göstərir və soydaşlarımız istənilən an müraciət edə bilərlər”, - deyə məlumatda qeyd olunur.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
