Azərbaycanın və Belçikanın xarici işlər nazirlikləri arasında siyasi məsləhətləşmələr keçirilib
Bakı, 30 may, AZƏRTAC
Azərbaycanın və Belçikanın xarici işlər nazirlikləri arasında siyasi məsləhətləşmələr keçirilib.
Xarici İşlər Nazirliyinin mətbuat xidmətindən AZƏRTAC-a bildiriblər ki, siyasi məsləhətləşmələrə Azərbaycan tərəfindən xarici işlər nazirinin müavini Xələf Xələfov, Belçika tərəfindən isə Xarici İşlər Nazirliyinin ikitərəfli əlaqələr üzrə baş direktoru Anik Van Kalster rəhbərlik edib.
Ölkələr arasında əməkdaşlıq əlaqələrinin daha da inkişaf etdirilməsi üçün yüksək səviyyəli ikitərəfli səfərlərin həyata keçirilməsinin əhəmiyyətini qeyd edən nazir müavini Xələf Xələfov siyasi münasibətlərin cari səviyyəsini yüksək qiymətləndirib və ölkəmizin Belçika ilə bütün sahələrdə əməkdaşlığın dərinləşdirilməsində maraqlı olduğunu xüsusi vurğulayıb. Nazir müavini X.Xələfov Azərbaycanın və Belçikanın xarici işlər nazirlikləri arasında mütəmadi olaraq siyasi məsləhətləşmələrin aparılmasının effektiv mexanizm olduğunu və yeni əməkdaşlıq istiqamətlərinin müəyyən edilməsi baxımından faydalı olduğunu diqqətə çatdırıb.
İqtisadi sahədə əməkdaşlıq münasibətlərinin inkişafı üçün geniş potensialın olduğunu bildirən X.Xələfov Belçika şirkətlərinin ölkəmizdə həyata keçirilən layihələrdə fəal iştirak etdiyini, lakin ölkələr arasında ticarət dövriyyəsinin iki ölkənin potensialına uyğun olmadığını və mövcud imkanlardan tam istifadə edilməsinin zəruriliyini qeyd edib.
Nazir müavini X.Xələfov Azərbaycanın təşəbbüsü və iştirakı ilə həyata keçirilən irimiqyaslı nəqliyyat və infrastruktur layihələri haqqında ətraflı məlumat verib Şimal-Cənub və Şərq-Qərb nəqliyyat marşrutlarının, o cümlədən Bakı-Tbilisi-Qars dəmir yolu xəttinin Asiya ölkələrinin Avropa bazarlarına çıxması, eləcə də sözügedən regionda insanlararası təmasın daha da artması üçün əlverişli imkanlar yaratdığını diqqətə çatdırıb.
Mayın 28-də Azərbaycanın dövlət müstəqilliyinin 100 illik yubileyinin təntənəli şəkildə qeyd olunduğunu vurğulayan X.Xələfov ölkəmizin demokratik ənənələrə sadiq olduğunu və bu yolla uğurla inkişaf etdiyini qeyd edib. İki ölkənin xalqları arasından təmasların daha da güclənməsi məqsədilə X.Xələfov qarşılıqlı şəkildə mədəniyyət günlərinin keçirilməsinin əhəmiyyətini vurğulayıb.
Ermənistanın Azərbaycana qarşı hərbi təcavüz etdiyini, ölkəmizin ərazilərinin 20 faizinin Ermənistan tərəfindən işğal edildiyini deyən nazir müavini münaqişənin regionda sülhə, sabitliyə və hərtərəfli inkişafa başlıca təhdid olaraq qalmaqda davam etdiyini, Azərbaycanın işğal faktoru ilə heç zaman barışmayacağını və ATƏT-in Minsk qrupunun həmsədrlərinin münaqişənin ədalətli həlli istiqamətində səylərini artıracağına ümidvar olduğunu bildirib. BMT Təhlükəsizlik Şurasının münaqişə ilə əlaqədar qətnamələrinin hələ də icra olunmamasından təəssüfləndiyini bildirən X.Xələfov beynəlxalq hüququn təməl prinsiplərinin, xüsusilə zor işlətməklə dövlətlərin beynəlxalq səviyyədə tanınmış sərhədlərinin dəyişdirilməsi cəhdlərinin qəbuledilməz olduğunu və münaqişənin Azərbaycanın ərazi bütövlüyü çərçivəsində həll edilməsinin vacibliyini vurğulayıb. X.Xələfov Ermənistan-Azərbaycan, Dağlıq Qarabağ münaqişəsinin həll edilməsinə dair Azərbaycanın haqlı mövqeyini dəstəklədiyinə görə Belçika tərəfinə təşəkkürünü bildirib.
Nazir müavini X.Xələfov Avropa İttifaqı ilə münasibətlərin inkişafında ölkəmizin maraqlı olduğunu bildirərək Belçikanın bu əlaqələrin inkişafında səylərini yüksək qiymətləndirib.
Azərbaycanın dövlət müstəqilliyinin 100 illik yubileyi münasibətilə səmimi təbriklərini çatdıran belçikalı diplomat Azərbaycan Xalq Cümhuriyyətinin qadınlara seçki hüququnu verməsini mütərəqqi tarixi hadisə kimi dəyərləndirib.
İki ölkənin xarici işlər nazirlikləri arasında siyasi məsləhətləşmələrin davam etdirilməsinin vacibliyini vurğulayan A.V.Kalster Belçika və Azərbaycan arasındakı münasibətlərin cari səviyyəsini yüksək qiymətləndirib. Diplomatik nümayəndəliklərin ikitərəfli əməkdaşlığın inkişafındakı səylərini təqdir edən A.V.Kalster son dövrlər iki ölkə arasında yüksək səviyyəli görüşlərin keçirildiyini diqqətə çatdırıb.
Ölkəsinin Azərbaycan ilə müxtəlif sahələrdə əməkdaşlıq etdiyini və bir sıra mübadilə proqramlarının həyata keçirdiyini vurğulayan belçikalı diplomat enerji sahəsində Azərbaycanın Avropa İttifaqının, xüsusilə Belçikanın strateji tərəfdaşı olduğunu və ARDNŞ ilə Belçika şirkətlərinin bu sahədə səmərəli əməkdaşlıq həyata keçirdiyini xüsusilə vurğulayıb.
A.V.Kalster ölkəsinin Ermənistan-Azərbaycan, Dağlıq Qarabağ münaqişəsi ilə bağlı mövqeyinin dəyişməz olduğunu söyləyib, münaqişənin beynəlxalq hüquq və BMT Təhlükəsizlik Şurasının məlum qətnamələrinin yerinə yetirilməsi və ATƏT-in Minsk qrupunun vasitəçiliyi ilə sülh yolu ilə həllinə tərəfdar olduğunu qeyd edib.
Görüşdə iki ölkə arasında humanitar, kənd təsərrüfatı, bərpa olunan enerji, turizm və digər sahələrdə əməkdaşlıq imkanları müzakirə edilib. Mədəni əlaqələrin təşviqi və viza sadələşdirilməsi məsələlərinə diqqət yetirilib.
Söhbət zamanı, həmçinin beynəlxalq təşkilatlar çərçivəsində əməkdaşlıq və parlamentlərarası əlaqələrin inkişafı imkanları, qarşılıqlı maraq kəsb edən regional və beynəlxalq məsələlər müzakirə edilib.
Bölmənin digər xəbərləri
