AZƏRBAYCANIN VƏ DANİMARKANIN XARİCİ İŞLƏR NAZİRİ MƏTBUAT KONFRANSI KEÇİRMİŞLƏR
Qapalı keçən görüşdən sonra nazirlər kütləvi informasiya vasitələrinin nümayəndələri üçün mətbuat konfransı keçirmişlər. Müzakirələrin həm siyasi, həm də iqtisadi cəhətdən çox faydalı olduğunu qeyd edən Elmar Məmmədyarov, Danimarka hökumətinin qaçqın və məcburi köçkünlərimizə son yeddi il ərzində 14 milyon ABŞ dolları məbləğində humanitar yardım etməsini xüsusi vurğuladı. Nazir, görüşdə Ermənistan-Azərbaycan, Dağlıq Qarabağ münaqişəsinin nizamlanması, terrorizmə və kütləvi qırğın silahlarına qarşı mübarizə, beynəlxalq və regional məsələlərə toxunulduğunu da söylədi.
Per Stiq Möller son illər Qərbi Avropa ölkələrinin, eləcə də Danimarkanın Azərbaycanla əlaqələrinin xeyli artdığını nəzərə çatdırdı. Əlaqələrin daha da inkişafında ölkəsinin maraqlı olduğunu deyən danimarkalı nazir, sabah Azərbaycanda fəxri konsulluqlarının, bir neçə aydan sonra isə səfirliklərinin açılacağını diqqətə çatdırdı. Qonaq dedi ki, Danimarka Azərbaycana ətraf mühitin qorunmasında və enerji sahəsinin inkişafında kömək göstərməyə hazırdır.
Sonda nazirlər jurnalistlərin suallarına cavab verdilər.
Bölmənin digər xəbərləri
