AZƏRBAYCANIN XARİCİ İŞLƏR NAZİRİ E.MƏMMƏDYAROVUN YEKUN MƏTBUAT KONFRANSI
Agentliyin baş direktorunun birinci müavini Mixail Qusman mətbuat konfransını açaraq bildirdi ki, hələ ilin əvvəlində elə bu salonda biz Azərbaycan Respublikasının Prezidenti İlham Əliyevi salamlamışdıq. İndi bu xoş ənənə davam edir və biz Azərbaycanın xarici işlər naziri Elmar Məmmədyarovu salamlayırıq.
Azərbaycan XİN-in başçısı jurnalistlərə rusiyalı həmkarı ilə avqustun 18-də keçirilmiş məsləhətləşmələrin yekunu barədə məlumat verdi. O dedi ki, Moskvada aparılmış danışıqları kifayət qədər uğurlu səciyyələndirmək olar, səfər zamanı siyasi, iqtisadi və humanitar xarakterli bir sıra aktual məsələlər müzakirə edilmişdir.
Ölkəmizin XİN başçısı Rusiya KİV-ləri müxbirlərinin suallarına cavab verərək bildirdi ki, müzakirə edilən əsas mövzulardan biri Ermənistan-Azərbaycan, Dağlıq Qarabağ münaqişəsinin nizama salınması problemi idi. E.Məmmədyarov dedi ki,“biz dondurulmuş münaqişələr ideyasına inanmırıq”, xarici işlər naziri kimi mən bu münaqişənin dincliklə nizama salınması mövqeyini axıradək qoruyacağam. Dünya birliyi belə bir anlayışı dəqiq müəyyən etməlidir ki, etnik təmizləmələr və ərazilərin işğalı məsələlərin həlli yolu deyildir. Ermənistan silahlı qüvvələri Dağlıq Qarabağın inzibati sərhədlərindən kənarda yerləşən və heç vaxt erməni əhalisinin yaşamadığı əraziləri işğal etmişlər. Bununla da etnik təmizlənmə aparılmışdır, hazırda orada bir nəfər də olsun, azərbaycanlı yoxdur. Təbii ki, məcburi köçkünlər öz daimi yaşayış yerlərinə qayıtmayınca danışıqlarda ciddi irəliləyiş olacağına ümid bəsləmək çətindr. E.Məmmədyarov bildirdi ki, ümumən, danışıqlar prosesi gedir, Azərbaycan və Ermənistan prezidentləri iki görüş, xarici işlər nazirləri üç görüş keçirmişlər və bu görüşlər münaqişənin nizama salınması yollarının axtarılmasına həsr olunmuşdur.
E.Məmmədyarov ATƏT-in Minsk qrupunun fəaliyyətindən danışaraq vurğuladı ki, ABŞ, Fransa və Rusiya kimi dövlətlər, yəni BMT Təhlükəsizlik Şurasının daimi üzvləri, dünya siyasətindəki ən nüfuzlu qüvvələrin bütün nümayəndələri münaqişənin həlli məsələsində öz sanballı sözünü deməlidirlər.
Azərbaycan XİN-in başçısı həmçinin bəyan etdi ki, iqtisadi məsələlər barədə də aparılan geniş fikir mübadiləsi əmtəə dövriyyəsinin artırılması, energetika sahəsində, habelə təhsil, humanitar və turizm sahələrində əməkdaşlığı dərinləşdirmək üçün böyük imkanlar açır. Nazir Azərbaycanda həyata keçirilən energetika layihələri, o cümlədən Bakı-Tbilisi-Ceyhan neft kəmərinin tikintisi, qaz layihələri, “Şimal-Cənub” nəqliyyat layihəsi üzərində ətraflı dayandı.
NATO hərbi bazalarının Azərbaycan ərazisində yerləşdirilməsinin mümkünlüyü barədə suala cavabında nazir bildirdi ki, bu, bir sıra amillərdən asılı olan çoxpilləli və mürəkkəb məsələdir. İndiki vəziyyətdə bu barədə danışmaq sadəlövhlükdür.
E.Məmmədyarov bildirdi ki, qlobal terrorizmlə mübarizə məsələsi Moskvada da müzakirə edildi və ümumi rəy belədir ki, bu bəla ilə mübarizə aparmaq lazımdır. O, fikrini yekunlaşdıraraq dedi: “Azərbaycan müstəqilliyə qovuşduğu vaxtdan bəri öz ərazisində 32 terror aktı ilə qarşılaşmışdır və terrorizmin nə kimi müsibətlər doğurduğunu bilir. Bu məsələdə Rusiyanın və Azərbaycanın mövqeləri uyğun gəlir. Biz bu sahədə əməkdaşlığı davam etdirəcəyik”.
E.Məmmədyarov Xəzərin statusuna dair danışıqlar prosesinə toxunaraq bildirdi ki, danışıqlar davam etdiriləcək və bu məsələ sentyabrda Moskvada xarici işlər nazirlərinin müavinləri səviyyəsində müzakirə olunacaqdır.
Bölmənin digər xəbərləri
