AZƏRBAYCANIN XARİCİ İŞLƏR NAZİRİ İRANIN ÖLKƏMİZDƏKİ SƏFİRİ İLƏ GÖRÜŞMÜŞDÜR
Xarici İşlər Nazirliyinin mətbuat mərkəzindən AZƏRTAC-a bildirmişlər ki, səfir Əhəd Qəzai respublikamızda işlədiyi müddətdə ona göstərilmiş köməyə və səmərəli əməkdaşlığa görə Azərbaycan tərəfinə minnətdarlığını bildirərək, ölkələrimiz arasında dostluq münasibətlərinin gələcəkdə də inkişaf edəcəyinə əmin olduğunu söyləmişdir.
Respublikamızın xarici siyasət idarəsinin başçısı Elmar Məmmədyarov Azərbaycanın İranla hərtərəfli əməkdaşlığa böyük əhəmiyyət verdiyini vurğulayaraq, ölkələrimiz arasında mövcud münasibətlərin möhkəmlənməsi və işgüzar əlaqələrin genişlənməsi sahəsində səfirin rolunu yüksək qiymətləndirmişdir.
Görüşdə nazir Elmar Məmmədyarov və səfir Əhəd Qəzai Azərbaycan xalqının ümummilli lideri, Prezident Heydər Əliyevin 2002-ci ildə İrana və Prezident Seyid Məhəmməd Xatəminin bu il ölkəmizə rəsmi səfərlərini yüksək dəyərləndirərək, bu səfərlər zamanı imzalanmış ikitərəfli sazişlərin dövlətlərimiz arasında siyasi, iqtisadi və digər sahələrdə əməkdaşlığın inkişafına təkan verdiyini bildirmişlər.
Sonda nazir Elmar Məmmədyarov səfir Əhəd Qəzaiyə gələcək fəaliyyətində uğurlar arzulamışdır.
Bölmənin digər xəbərləri
