Bakı, 15 oktyabr, AZƏRTAC

15 oktyabr tarixi Azərbaycanın şanlı zəfər tarixinə qızıl hərflərlə yazılan və xalqımızın yaddaşında əbədi yaşayacaq bir tarixdir. Düz bir il əvvəl – 2023-cü il oktyabrın 15-də Prezident İlham Əliyev Xankəndi şəhərində Azərbaycanın Dövlət Bayrağını ucaldıb. Bu böyük tarixi hadisəyə şahidlik edən Azərbaycan xalqı ürəkdən sevinir. Xalqımız bu böyük tarixi qələbəyə nail olmaq üçün 30 ildən çox gözləyib. Bu səbrin əsasında xalqımızın öz Liderinə olan böyük inamı və etibarı dayanıb.

AZƏRTAC xəbər verir ki, bu fikirlər Milli Məclisin deputatı, tarix elmləri doktoru Vasif Qafarovun “Azərbaycanın Zəfər tarixinin 15 oktyabr zirvəsi” adlı məqaləsində yer alıb.

2003-cü il oktyabrın 15-də keçirilən prezident seçkilərində Azərbaycan xalqının etimadını qazanan İlham Əliyev dövlət başçısı kimi öz vəzifəsinin icrasına başlayanda qarşısında dayanan bir nömrəli vəzifə kimi Azərbaycan Bayrağının o vaxt işğal altında olan bütün ərazilərdə qaldırmaq olduğunu bəyan etmişdi. Ötən zaman ərzində bu müqəddəs məqsədə nail olmaq üçün böyük əzmlə çalışan dövlətimizin başçısı yürütdüyü müdrik siyasət nəticəsində Ermənistan-Azərbaycan münaqişəsini həll etmək üçün güclü siyasi və hüquqi zəmin yaratdı. Eyni zamanda, ölkənin iqtisadi inkişafını təmin etdi, ordunu gücləndirdi, hərbi sənayeni yaratdı və inkişaf etdirdi. Elə bir güclü ordu yaratdı ki, o, istənilən şəraitdə istənilən vəzifəni şərəflə yerinə yetirməyi və qalibiyyətlə yekunlaşdırmağı bacardı, Vətən müharibəsində cəmi 44 gün ərzində düşməni kapitulyasiya aktına imza atmağa məcbur etdi. Bu gün hər bir azərbaycanlı haqlı olaraq Silahlı Qüvvələrimizlə fəxr edir. Məhz bu uzaqgörən siyasətin və yorulmaz fəaliyyətin nəticəsidir ki, Prezident İlham Əliyev xalqımız qarşısında ən böyük tarixi missiyanı yerinə yetirdi, işğal altındakı torpaqlarımızı azad etdi və ölkənin suverenliyini bərpa etdi, bu müqəddəs anları Azərbaycan xalqına yaşatdı.

Azərbaycanın son 200 illik tarixinə nəzər salsaq görərik ki, böyük hərbi, siyasi, diplomatik, iqtisadi, mədəni nailiyyətlərimizin siyahısı çox da geniş deyil. Dövlətçilik tariximizdə müstəsna əhəmiyyətli mərhələlərin, xüsusən müstəqilliyin əldə edilməsi, bərpası və qorunub saxlanması kimi tarixi hadisələrə bərabər sayılacaq günlər əsasən müasir dövrümüzə təsadüf edir.

Yüzillik müstəmləkə əsarətindən sonra 1918-ci il mayın 28-də Azərbaycan Xalq Cümhuriyyətinin yaradılması ilə xalqımız istiqlalına qovuşdu. 23 ay davam edən müstəqillik dövründə Cümhuriyyət ölkənin ərazi bütövlüyünün və suverenliyinin təmin edilməsi istiqamətində böyük işlər gördü. Lakin bu müstəqillik uzun çəkmədi. 1920-ci il aprelin 28-də Azərbaycanın sovetləşdirilməsindən sonrakı dövrdə xalqımızın iradəsinin əksinə olaraq torpaqlarımızın sistemli və mərhələli şəkildə Ermənistana verilməsi prosesi başladı. 1918-ci ildə tarixi Azərbaycan torpağı olan İrəvan bölgəsində yaradılan Ermənistan sovet hakimiyyəti illərində məhz bizim torpaqlarımız hesabına öz ərazisinin sahəsini 9 min kvadratkilometrdən 29 min 743 kvadratkilometrə qədər genişləndirməyə nail oldu. Ümummilli Lider Heydər Əliyevin 1969-cu ildə Azərbaycan SSR rəhbərliyinə gəlməsindən sonrakı illərdə ərazilərimizdən Ermənistana bir qarış da olsa torpaq verilmədi. 1987-ci ildə Ulu Öndərin vəzifədən kənarlaşdırılmasından iki həftə keçməmiş erməni millətçiləri yenidən Azərbaycana qarşı ərazi iddialarını dilə gətirməyə başladılar. Azərbaycanın Heydər Əliyevsiz qaldığı 6 il - 1987-1993-cü illər bizim üçün faciəvi, böhranlı, utancverici illər kimi tarixdə qalıb. Həm sovet, həm də müstəqillik dövrlərində bir-birini dəyişən antimilli hökumətlər faktiki olaraq öz şəxsi maraqlarını qorumağa çalışdılar, nəticədə torpaqlarımız işğal altına düşdü, xalqımız böyük bəlalarla üzləşdi.

Ümummilli Lider Heydər Əliyev 1993-cü ildə xalqın tələbi ilə hakimiyyətə qayıtmaqla çox böyük tarixi missiyanı yerinə yetirdi, Azərbaycanı düşdüyü dərin hərbi-siyasi böhrandan çıxardı və onun müstəqil dövlət kimi yaşamasını təmin etdi.

Xalqımızın çoxəsrlik dövlətçilik ənənələrinin davam etdirilməsi, beynəlxalq münasibətlər sisteminin subyekti kimi möhkəmlənməsi, diplomatik müstəvidə milli maraqlarımızın qorunması istiqamətində çox mühüm addımlar məhz Müzəffər Ali Baş Komandan, Prezident İlham Əliyevin uzaqgörən, müdrik və peşəkar siyasəti nəticəsində mümkün oldu.

Azərbaycanda müstəqilliyin bərpa edilməsindən sonra ölkəmizin siyasi və təhlükəsizlik maraqlarının qorunmasında Ulu Öndərin müəyyənləşdirdiyi siyasi kurs özünü tamamilə doğrultdu və cəmiyyətdə çox geniş dəstək qazandı.

Müasir dövrümüzdə qazanılan bütün uğurlar dərin siyasi-diplomatik təmələ əsaslanır. Ölkəmizin müstəqilliyini bərpa etdikdən sonra üzləşdiyi dərin hərbi-siyasi, sosial böhrandan çıxması asan başa gəlməyib. Dövlətçiliyin möhkəmləndirilməsi işi Qarabağ və ətraf rayonların işğalı şəraitində, mürəkkəb və ziddiyyətli beynəlxalq hərbi-siyasi vəziyyətə paralel aparılıb.

Azərbaycan xalqı Qarabağda bir neçə dəfə böyük itkilərlə müşayiət olunan müharibələrə cəlb olunub. Bu müharibələrdə məqsəd Qarabağın Azərbaycandan qoparılması, əhalidə məğlubiyyət sindromunun formalaşdırılması, xalqın güclü dövlət yaratmaq inamının sarsıdılması olub.

Nəhayət, 2020-ci il sentyabrın 27-də başlayan 44 günlük irimiqyaslı hərbi əməliyyatlar ölkəmizin çox böyük hərbi-siyasi uğurlar qazanması ilə nəticələndi. Bu tarixi Qələbə nəinki xalqımızın taleyində, eyni zamanda, regionda və beynəlxalq münasibətlərdə bir çox parametrlər üzrə yeni bir dövrün başlanğıcıdır, əvvəlki dövrlərlə müqayisə olunmayacaq nəhəng nailiyyətdir.

Noyabrın 10-da ölkəmizin Zəfər tarixi yaradıldı. Həmin tarix hərbi, ictimai, siyasi, diplomatik və sosial-psixoloji istiqamətlər üzrə ölkəmizə ardıcıl uğurlar qazandırdı. Silahlı Qüvvələrimizin qüdrəti, hərbi qulluqçularımızın cəsarəti, peşəkarlığı, igidliyi çağdaş hərb tariximizdə yeni qəhrəmanlıq səhifəsini yazdı. Xüsusilə də Müzəffər Ali Baş Komandanın müdrik siyasəti nəticəsində ölkənin bütün siyasi qüvvələri, vətəndaş cəmiyyəti, media orqanları könüllü səfərbərlik və həmrəylik nümayiş etdirdilər, Prezidentin hərbi-siyasi iradəsinə açıq dəstək verildi. Ölkəmizin ərazi bütövlüyünün təmin olunması prosesində, informasiya siyasətinin uğurla aparılmasında yekdil mövqe sərgiləndi. Qarabağın gələcək siyasi taleyi ilə bağlı beynəlxalq ictimaiyyətin illərlə formalaşdırdığı status-kvo 44 gün ərzində dəyişdi. Qarabağda heç bir siyasi-hüquqi statusun olmayacağı ən yüksək kürsüdən qətiyyətlə bəyan olundu. Erməni xalqının Azərbaycan ərazisində yenidən “öz müqəddəratını təyin etməsi” iddiasına qəti şəkildə imkan verilməyəcəyi aydınlaşdı.

İyirmi səkkiz ildən sonra Azərbaycan-İran sərhədi və Azərbaycan-Ermənistan sərhədi istisnasız olaraq dövlət nəzarətinə götürüldü. Ölkənin regionda imici yüksəldi, ərazi bütövlüyünün təmin olunması istiqamətində önəmli nəticələr əldə edildi, yeni regional təhlükəsizlik və əməkdaşlıq sisteminin əsası qoyuldu. İllərlə davam edən “məğlub xalq” psixologiyası qısa müddətdə dağıldı. Bir milyona yaxın məcburi köçkün statusunda olan vətəndaşımız yenidən əvvəlki statusunu qazandı.

Vətən müharibəsində torpaqlarımızın işğaldan azad edilməsi, ərazi bütövlüyümüzün və suverenliyimizin qeyd-şərtsiz bərpası, Qarabağ məsələsinin köklü şəkildə həll olunacağı istiqamətində qərarlılığımızı bütün dünyaya göstərdi.

Ötən il sentyabrın 19-20-də həyata keçirilən antiterror əməliyyatı nəticəsində bu qərarlılığı bütün dünyaya isbat edə bildik. Bu əməliyyat nəticəsində Azərbaycanda separatizmin son yuvası dağıdıldı. Xocalıda, Ağdərədə, Xocavənddə, Əsgəranda və Xankəndidə üçrəngli Bayrağımız dalğalanmağa başladı. Xüsusilə də 2023-cü il oktyabrın 15-də Müzəffər Ali Baş Komandan, Prezident İlham Əliyevin Xankəndi şəhərində Azərbaycanın Dövlət Bayrağını ucaltması ilə ölkəmizin Zəfər tarixinin ən yüksək nöqtəsi qoyuldu. Bununla da 1923-cü ildə Azərbaycan xalqının iradəsinin əksinə olaraq torpaqlarımızda yaradılan və heç bir tarixi, coğrafi, siyasi əsası olmayan erməni separatizminin yuvası dağıdıldı, kökü kəsildi.

Ötən il oktyabrın 15-də Ali Baş Komandan İlham Əliyevin Xankəndinin mərkəzində Dövlət Bayrağımızı ucaldarkən dediyi kimi, Azərbaycan xalqı elə bir Qələbə qazanıb ki, həm dillər əzbəri olub, həm də bu Qələbə əbədi bizimlə olacaq. Bu Qələbə bizim tariximizdə əbədi olacaq. Bizdən sonra gələn nəsillər bu Qələbə ilə əbədi və haqlı olaraq fəxr edəcəklər.

Azərbaycan xalqı bu Qələbəni öz qanı, canı bahasına əldə edib. Dövlətimizin başçısının vurğuladığı kim, bu Qələbənin əsas memarları Vətən uğrunda canından keçən şəhidlər, qazilərdir və bütövlükdə xalqımızdır. Şəhid və qazi ailələri cəmiyyətin ən dəyərli, həssas sosial qrupları kimi dövlətin hərtərəfli dəstəyi və himayəsi ilə əhatə olunub.

Hazırda Azərbaycan hərbi qələbələrini beynəlxalq ictimai rəydə siyasi-diplomatik gedişləri ilə möhkəmləndirmək istiqamətində mürəkkəb mərhələni də uğurla addımlayır. Dövlətin siyasi gücünün artması və beynəlxalq imicinin yüksəlməsi fonunda işğaldan azad edilən yaşayış məskənlərinin bərpası prosesi çox sürətlə gedir. Torpaqlarımızın işğaldan azad edilməsindən keçən bu qısa müddət ərzində Şərqi Zəngəzur, Qarabağ, o cümlədən Xankəndi, Xocalı və digər rayon və şəhərlər yenidən qurulur, bu yerlərə yeni həyat gəlir. Keçmiş məcburi köçkünlərin öz yurdlarına qayıtması prosesi uğurla gedir.

Böyük tarixi zəfərlərə, tarixi anlara, Qarabağ və Şərqi Zəngəzurda həyata keçirilən böyük quruculuq işlərinə və azad olunan ərazilərimizə Böyük Qayıdışa şahidlik etmək hər bir azərbaycanlı üçün qürurvericidir.

Əminik ki, Prezident İlham Əliyevin rəhbərliyi ilə işğaldan azad olunan bütün ərazilərimiz qısa müddətdə tam bərpa olunub cənnətə çevriləcək. İşğaldan azad edilmiş ərazilərimizdə ucaldılan üçrəngli Bayrağımız əbədi dalğalanacaq və Azərbaycan xalqı burada əbədi yaşayacaq.