AZƏRBAYCANLA GÜRCÜSTAN ARASINDA DİPLOMATİK MÜNASİBƏTLƏR YARADILMASININ ON İLLİYİNƏ HƏSR OLUNMUŞDUR
Xarici işlər nazirinin müavini Xələf Xələfov və Gürcüstanın ölkəmizdəki səfiri Zurab Qumberidze Azərbaycanla Gürcüstan arasında diplomatik münasibətlər yaradılmasının 10 illiyi münasibətlə mətbuat konfransı keçirmişlər.
1992-ci il noyabrın 18-də dövlətlərimiz arasında diplomatik münasibətlər yaradılmışdır. Xələf Xələfov xatırlatdı ki, 1995-ci ildə Gürcüstan Bakıda, bir il sonra isə Azərbaycan Tbilisidə öz səfirliklərini açdılar. Nazir müavini xalqlarımız arasında münasibətlərin tarixindən danışaraq bildirdi ki, əsrlər boyu Azərbaycanla Gürcüstanı sıx dostluq telləri bağlamışdır. Lakin SSRİ-nin süqutu nəticəsində ölkələrimiz öz dövlətçiliyini bərpa etdikdən sonra bu münasibətlərin dərinləşdirilməsi üçün yeni imkanlar açıldı.
İki ölkə arasında əlaqələrin inkişafı və genişlənməsində dövlət başçılarının - prezidentlər Heydər Əliyevin və Eduard Şevardnadzenin şəxsi dostluğunun xüsusi rolu olmuşdur.
Mətbuat konfransında bildirildi ki, ötən 10 ildə dövlətlərimiz arasında 85-dən çox sənəd imzalanmışdır. Azərbaycan və Gürcüstan TRASEKA kimi regional layihələrin təşəbbüsçüsüdür, Bakı-Tbilisi-Ceyhan, Bakı-Tbilisi-Ərzurum enerji layihələri birlikdə həyata keçirilir. Ölkələrimiz arasında əmtəə dövriyyəsi ilbəil artır. Azərbaycan və Gürcüstan beynəlxalq təşkilatlarda vahid mövqelərdən çıxış edir.
Mətbuat konfrarnsında vurğulandı ki, Azərbaycanla Gürcüstan arasındakı dostluq münasibətləri regionun digər dövlətləri üçün nümunə ola bilər.
Bölmənin digər xəbərləri
