Azərbaycanlı dizayner Milanda yeni kolleksiyanı təqdim edib
Milan, 28 sentyabr, AZƏRTAC
İtaliyanın Milan şəhərində fəaliyyət göstərən azərbaycanlı dizayner Qalib Həsənovun təsis etdiyi “Institution” brendi növbəti dəfə beynəlxalq moda arenasında diqqət mərkəzində olub.
AZƏRTAC xəbər verir ki, dizaynerin “Collection 04 – Su” adlı yeni kolleksiyası suyun mənəvi və mədəni simvolikasından ilhamlanaraq təqdim olunub. “Su” sözü qədim Proto-türk dilindən qaynaqlanır və “su həyat və ruhun güzgüsü” mənasını daşıyır. Kolleksiyanın əsas ideyası da məhz insan və təbiət arasında əlaqənin, həmçinin ənənə ilə müasirliyin harmoniyasının modada əks olunmasıdır.
Yeni kolleksiyada ənənəvi çəpkən geyimindən ilhamlanan qadın jiletləri, əl ilə toxunmuş parçalar və unikal dizayn həlləri yer alır. Kolleksiyanın hazırlanmasında Azərbaycanın Masallı və Lənkəran bölgələrində qadın icmaları fəal iştirak edib. Burada əsasən Typha Latifolia (qamış/rüş) bitkisindən istifadə olunaraq, qədim toxuculuq ənənələri yenidən canlandırılıb.
Bundan başqa, kolleksiyaya daxil edilən bəzi əl işləri Gürcüstandakı azərbaycanlı icmalar tərəfindən toxunub. Bu işlər həm qədim Borçalı xalçaçılıq ənənələrinə istinad edir, həm də müasir materiallarla zənginləşdirilib. Məsələn, pambıq ayaqqabı bağlarından hazırlanan unikal parçalar brendin DNA-sını simvollaşdırır.
Təqdimatda xüsusi olaraq azərbaycanlı pianoçu Etibar Əsədli də çıxış edib. Onun canlı piano və DJ ifası kolleksiyaya musiqi ahəngi qataraq tədbirə xüsusi rəng verib.
Qalib Həsənov bildirib ki, “Institution”un məqsədi mədəni irsi qorumaq, qadın icmalarını dəstəkləmək və davamlı modanı təşviq etməkdir.
Kolleksiya İtaliyadakı Azərbaycan Mədəniyyət Mərkəzinin dəstəyi ilə təqdim olunub.
Nihad Budaqov
AZƏRTAC-ın xüsusi müxbiri
Milan
Bölmənin digər xəbərləri
