Azərbaycanlı rejissor Türkiyədə beynəlxalq mükafata layiq görülüb
Ankara, 22 may, AZƏRTAC
Türkiyənin paytaxtı Ankarada keçirilən nüfuzlu “Gümüş Karyera Ödülləri” beynəlxalq mükafatının təqdimetmə mərasimi bu il də ictimai-siyasi, media, mədəniyyət, sənət və akademik sahələrin tanınmış simalarını bir araya gətirib.
AZƏRTAC xəbər verir ki, artıq dördüncü dəfə təşkil olunan tədbirdə Türkiyənin müxtəlif dövlət qurumlarının nümayəndələri, deputatlar, tanınmış media təmsilçiləri, ictimai xadimlər, sənət adamları və diplomatik korpusun nümayəndələri iştirak ediblər.
Azərbaycanı bu nüfuzlu beynəlxalq platformada teatr və kino rejissoru Saida Haqverdiyeva təmsil edib. O, “Gümüş Karyera” mükafatına kino və teatr sahəsində uzunillik səmərəli yaradıcılıq fəaliyyəti, milli-mənəvi dəyərlərin sənət vasitəsilə təbliği, eləcə də Qarabağ müharibəsinin ağrılarını və insan talelərini əks etdirən “Köhnə çamadanlar” tammetrajlı bədii filminin uğurlu beynəlxalq təqdimatına görə layiq görülüb.
Xüsusilə filmin Ankara şəhərində keçirilən premyerası qardaş ölkənin media məkanında böyük maraq doğurub. Türkiyə mediasında film haqqında geniş məqalələr, müsahibələr və süjetlər yayımlanıb. Müxtəlif media qurumları ekran əsərini müharibənin insan talelərində buraxdığı dərin izləri həssas və emosional dillə təqdim edən uğurlu sənət nümunəsi kimi qiymətləndiriblər.
Təltifetmə mərasimində çıxış edən Saida Haqverdiyeva bu mükafatı yalnız şəxsi yaradıcılığının deyil, ümumilikdə Azərbaycan mədəniyyətinin və qadın sənətkarların uğuru kimi dəyərləndirdiyini bildirib.
O qeyd edib ki, fəaliyyəti boyunca insanın mənəvi dünyasını, xüsusilə qadınların daxili duyğularını, cəmiyyət içində yaşadığı psixoloji və sosial mübarizələri sənətin dili ilə ifadə etməyə çalışıb: “Mənim üçün sənət sadəcə peşə deyil. Sənət insanın ruhuna toxunmaq, onu düşündürmək, hiss etdirmək və bəzən də susaraq danışmaqdır. İllərdir teatr və kino vasitəsilə qadının daxili aləmini, onun cəmiyyətlə münasibətlərini, ağrılarını, sevgisini və gücünü göstərməyə çalışmışam. Bu gün belə bir beynəlxalq mükafata layiq görülmək mənim üçün böyük qürur və məsuliyyətdir”.
Rejissor çıxışında Azərbaycan və Türkiyə arasındakı mədəni bağların önəmini də xüsusi vurğulayıb: “Qardaş Türkiyədə Azərbaycan sənətinə göstərilən diqqət və sevgi bizi daha böyük işlər görməyə ruhlandırır. İnanıram ki, mədəniyyət xalqları bir-birinə daha da yaxınlaşdıran ən böyük körpüdür. Bu mükafatı ölkəmin sənət aləmində, teatr və kino mühitində çalışan bütün yaradıcı insanlar adından qəbul edirəm”.
S.Haqverdiyeva, həmçinin bildirib ki, Qarabağ mövzusunun beynəlxalq auditoriyaya çatdırılması onun yaradıcılığında xüsusi yer tutur: “Bizim yaşadığımız ağrıları, keçdiyimiz yolları və qazandığımız Zəfərin mənəvi tərəflərini sənət dili ilə dünyaya anlatmaq vacibdir. ‘Köhnə çamadanlar’ filmi də məhz insan taleləri üzərindən yaddaş, həsrət və Vətən anlayışını təqdim etməyə çalışır”.
Məlumat üçün bildirək ki, “Gümüş Karyera Ödülləri” müxtəlif sahələrdə fərqlənən şəxslərin təltif olunduğu beynəlxalq ictimai-mədəni layihədir. Mükafatlandırma BY Media şirkətinin “Protokol” dərgisi tərəfindən həyata keçirilir və siyasət, biznes, media, sənət, elm və ictimai fəaliyyət sahələrində uğur qazanan şəxsləri əhatə edir.
Bölmənin digər xəbərləri
