Azərbaycanlılar sosial mediada Türkiyə əleyhinə kampaniyalara qarşı mübarizəyə başlayıblar
Bakı, 19 mart, AZƏRTAC
Türkiyənin terrorizmə qarşı həyata keçirdiyi tədbirləri daim dəstəkləyən Azərbaycan vətəndaşları sosial mediada da Prezident Rəcəb Tayyib Ərdoğan və qardaş ölkə haqqında əsassız və qərəzli xarakter daşıyan qarayaxmalara qarşı fəal mübarizəyə başlayıblar.
AZƏRTAC Anadolu agentliyinin saytına istinadla xəbər verir ki, Azərbaycan ictimaiyyəti Türkiyə Silahlı Qüvvələrinin Suriyanın Afrin bölgəsində keçirdiyi “Zeytun budağı” əməliyyatını da dəstəkləyərək, sosial mediada bəzi qüvvələrin Prezident Rəcəb Tayyib Ərdoğana və Türkiyə əleyhinə qaralama kampaniyalarına ciddi etirazlarını bildirir, belə çirkin əməllərə qarşı fəal mübarizə aparır.
Agentliyin bununla bağlı xəbərində qeyd olunur ki, “Zeytun budağı” əməliyyatının keçirildiyi günlərdə müxtəlif qeyri-hökumət təşkilatları Türkiyənin Bakıdakı səfirliyinin qarşısında bu əməliyyata dəstək aksiyaları təşkil ediblər. Həmçinin onlar əməliyyatın ilk şəhidi Musa Özalkanın vəsiyyətinə əsasən, İraqdakı türkmən şəhəri Telaferdə məktəb binasının tikilməsinə yardım məqsədilə kampaniya başladıblar.
Azərbaycanlı siyasətçilər də Türkiyənin terrorizmlə mübarizədə haqlı mövqeyini dəstəkləyirlər. Milli Məclisin deputatı Əli Məsimli Anadolu agentliyinin müxbirinə açıqlamasında deyib: “Afrin əməliyyatı təkcə Türkiyənin deyil, bütün bölgənin təhlükəsizliyi baxımından mühüm əhəmiyyət daşıyır. Bəzi ölkələr öz mənafelərini düşünərək bu əməliyyata qarşı çıxırlar. Azərbaycan xalqı isə həmişə olduğu kimi, yenə də Türkiyənin yanındadır. Afrin əməliyyatı, həmçinin mənfi meyillərə, separatçılığa, dünyada qarışıqlıq yaratmaq istəyənlərə qarşı həyata keçirilən vacib əməliyyatdır”.
Digər deputat Fazil Mustafa Afrin əməliyyatının kürdlərə qarşı deyil, terrorçu qruplaşmalara qarşı həyata keçirildiyini, Türkiyə Silahlı Qüvvələrinin mülki şəxsləri qorumaq üçün maksimum səy göstərdiyini vurğulayıb. Terrorçuların dinc insanlardan özlərini qorumaq üçün sipər kimi istifadə etdiklərini bildirən Fazil Mustafa deyib: “ABŞ bəzi qüvvələrdən Türkiyəyə qarşı istifadə edir. Həmin qüvvələr düşünürlər ki, xaricdən aldıqları silahlarla məkrli niyyətlərini reallaşdıra biləcəklər. Lakin Türkiyə kifayət qədər güclüdür və buna imkan verməyəcək. Kobani hadisələrində Türkiyəyə qarşı təhdid yaratmamaq şərti ilə onlara lazımi imkan yaradıldı. Lakin buna baxmayaraq, onların Türkiyəyə qarşı düşmənçilik mövqeyi dəyişmədi. Bu, Türkiyənin səbir kasasını daşırdı. Azərbaycan xalqı qardaş ölkənin bütün addımlarını dəstəkləyir”.
Deputat Musa Qasımlı bildirib: “Türkiyə xalqı uzun illərdir terrordan əziyyət çəksə də, buna böyük səbirlə dözüb. Lakin Türkiyə nəhayət, bu barədə qəti qərarını verdi. Onun qərarı BMT Nizamnaməsinə uyğundur. Çünki terror təşkilatları Türkiyəni təhdid edirdilər. Türkiyənin özünü müdafiə etməyə haqqı var. Terrora qarşı hamı mübarizə aparmalıdır. Türkiyənin yanında olanlar haqq və ədalətin yanındadırlar”.
Parlamentin deputatı Aqil Abbas isə bu barədə danışarkən deyib: “Bu, Türkiyənin haqq işidir. Sərhədləri qorumaq hər bir dövlətin haqqıdır. Türkiyədən ordusunu Afrindən geri çəkməyi tələb edən Avropa Parlamenti terror təşkilatlarına heç bir söz demir. Terrorçuların dinc insanlardan sipər kimi istifadə etmələrinə göz yumurlar. Sən min kilometr məsafədən gələrək Suriyada hərbi baza yarada bilərsən, bəs Türkiyənin öz qapısını qorumağa haqqı yoxdurmu? Prezident Ərdoğan bu məsələdə çox qətiyyətlidir. Biz də onu dəstəkləyirik”.
Agentlik vurğulayır ki, siyasətçilərlə yanaşı, Azərbaycan xalqı da sosial mediada Türkiyənin siyasətini dəstəkləyən paylaşmalar edir, qardaş ölkə əleyhinə həyata keçirilən məkrli kampaniyalara ciddi etirazlarını bildirirlər.
Amerika erməni lobbisinin saytında Mike Pompeonun ABŞ-ın xarici işlər naziri olmazdan əvvəl Türkiyə hakimiyyətini diktatorluqda ittiham edən “tvit”i azərbaycanlı istifadəçilərin etirazına səbəb olub. Ermənilərin M.Pompeonun fikrini dəstəkləmələrinə və “Zeytun budağı” əməliyyatını tənqid etmələrinə etirazını bildirən azərbaycanlı Nurlan Qələndərli sosial mediadakı şərhində yazıb: “Türkiyənin inkişafı sizi narahat edir. Türkiyə bu əməliyyatı sərhədlərinin təhlükəsizliyi və bölgədəki mülki şəxslərin xilas edilməsi üçün həyata keçirir”.
Leyla Şeyxəliyeva adlı istifadəçi isə ABŞ-ın Ermənistanı dəstəkləməsini başa düşmədiyini bildirib. Türkiyənin Suriya xalqını qorumaq istədiyini ifadə edən L.Şeyxəliyeva başqa bir şərhində ASALA terror təşkilatının üzvü, Suriya ermənisi Varucan Qarabediyanın Parisin Orli hava limanında törətdiyi qanlı terror aktını xatırladıb.
Nərmin Həsənova adlı digər istifadəçi Prezident Rəcəb Tayyib Ərdoğanın dünyanın güclü siyasi liderlərindən olduğunu, Türkiyənin bütün sahələrdə inkişaf etdiyini yazıb.
Sosial mediadakı şərhində Türkiyənin terrordan əziyyət çəkən ölkə olduğunu vurğulayan Vəfa adlı istifadəçi isə öz fikirlərini belə ifadə edib: “Türkiyənin inkişafından narazı olan qüvvələr bu ölkədə qarışıqlıq salmağa çalışırlar. Lakin onların məğlub olması labüddür”.
Bölmənin digər xəbərləri
