“AZƏRREYL” VOLEYBOLÇULARI “ƏCZAÇIBAŞI”YA İKİNCİ OYUNDA DA QALİB GƏLDİLƏR
Xatırladaq ki, ötən il bu klublar çempionlar liqasının seçmə turniri çərçivəsində iki dəfə görüşmüşdülər və onda da voleybolçularımız hər iki oyunda qələbə çalmışdılar.
Bu il “Azərreyl” çempionlar liqasının qrup turnirini məğlubiyyətsiz başa vurmuşdur.
25:23 hesabı ilə Türkiyə komandasının xeyrinə başa çatmış birinci hissədə güzəştsiz oyun getmişdir. Oyun gah bu, gah da digər komandanın üstünlüyü ilə keçmişdir. Lakin birinci hissənin axırında meydan sahibləri daha rəvan oynayaraq, qalib gəlmişlər.
Görüşün mənzərəsi ikinci hissədə də dəyişməz qalmışdır. Buna baxmayaraq, voleybolçu qızlarımız çətin məqamlarda rəqiblərindən daha yaxşı oyun nümayiş etdirmiş, bu hissənin axırında isə səhvsiz oynayaraq, 26:24 hesabı ilə onları udmuşlar.
Sonra “Azərreyl” təşəbbüsü tamamilə ələ alaraq, üçüncü hissəni qələbə ilə başa vurmuşdur:25:23. Dördüncü hissə də komandamızın qələbəsi ilə (25:21) başa çatmışdır.
Beləliklə, voleybolçu qızlarımız 3:1 hesabı ilə oyunu udmuş və çempionlar liqasının növbəti mərhələsinə çıxmışlar.
Bölmənin digər xəbərləri
