AZƏRTAC-ın ötən ildəki fəaliyyətinin yekunlarına dair hesabat yığıncağı keçirilib
Bakı, 15 yanvar, AZƏRTAC
Azərbaycan Dövlət İnformasiya Agentliyi (AZƏRTAC) tərəfindən 2023-cü il ərzində 190 mindən çox informasiya buraxılıb. AZƏRTAC-da informasiya buraxılışı işinin keyfiyyətinin yüksəldilməsi, operativliyin təmin olunması istiqamətində görülən işlər nəticəsində agentlik Azərbaycanın informasiya məkanında ilk sıralarda yer tutub.
Bu fikirlər AZƏRTAC-ın 2023-cü ildəki fəaliyyətinin yekunları ilə bağlı keçirilən hesabat yığıncağında səsləndirilib.
Əvvəlcə xalqımızın Ümummilli Lideri Heydər Əliyevin, Azərbaycanın müstəqilliyi və ərazi bütövlüyü uğrunda canından keçən şəhidlərimizin xatirəsi bir dəqiqəlik sükutla yad olunub.
AZƏRTAC-ın İdarə Heyətinin sədri Vüqar Əliyev hesabat məruzəsi ilə çıxış edərək il ərzində görülən işlər barədə məlumat verib. Bildirib ki, il ərzində AZƏRTAC-da ciddi kadr islahatları aparılıb, agentliyin loqosu və internet səhifəsi dəyişdirilib, işin keyfiyyətinin yaxşılaşdırılması üçün mühüm addımlar atılıb. Bütün bu işlər AZƏRTAC-ın fəaliyyətində özünü göstərib. Belə ki, AZƏRTAC-ın saytına baxış sayı il ərzində 70 faiz artaraq 25 milyona çatıb. AZƏRTAC-ın sosial şəbəkələrdəki əhatə dairəsinin genişləndirilməsi də xüsusilə diqqətdə saxlanılıb. Hazırda agentliyin müxtəlif dillərdə və fərqli profilli ümumilikdə 30 sosial şəbəkə səhifəsi var.
Həmçinin bildirilib ki, AZƏRTAC-da ciddi kadr islahatları həyata keçirilib, agentliyə peşəkar kadrlar cəlb edilib. Eyni zamanda, yeni kadrların cəlb edilməsi məqsədilə vakansiya elanları verilib, təcrübə proqramının icrasına başlanılıb. Tələbələr müxtəlif redaksiyalarda təcrübə keçir, bacarıqlı gənclər işə cəlb olunur. AZƏRTAC-ın xarici müxbir vəzifələrinə namizədlərin seçimi məqsədilə Müsabiqə Komissiyası yaradılıb və bu proses tam şəffaf qaydada həyata keçirilir.
İdarə Heyətinin sədri qeyd edib ki, il ərzində AZƏRTAC-ın beynəlxalq əlaqələrinin gücləndirilməsi istiqamətində ciddi işlər görülüb, xarici tərəfdaşlarla xəbər mübadiləsi həyata keçirilib. Hazırda 11 beynəlxalq və regional təşkilatın, informasiya platformasının üzvü olan AZƏRTAC-ın il ərzində 10 min 200 xəbəri beynəlxalq platformalarda, tərəfdaş agentliklərin və media qurumlarının saytlarında yayımlanıb. İl ərzində mühüm hadisələrdən biri də İstanbulda Türk Xəbər Agentlikləri Birliyinin (ATNA) təsis Baş Assambleyasının keçirilməsi olub. ATNA-nın prezidenti Anadolu Agentliyi, baş katibi AZƏRTAC seçilib.
İl ərzində AZƏRTAC-ın təşəbbüsü ilə həyata keçirilən layihə və tədbirlərdən söz açan Vüqar Əliyev Ulu Öndər Heydər Əliyevin anadan olmasının 100 illiyi münasibətilə agentliyin təqdim etdiyi ikihissəli sənədli filmi, media nümayəndələrinin iştirakı ilə keçirilən konfransı, 15-ə yaxın ölkədə təşkil edilən “Heydər Əliyev-100” fotosərgilərini xüsusi qeyd edib.
Hesabat yığıncağında bir sıra struktur rəhbərləri çıxış edərək il ərzində görülmüş işlər, qarşıda duran vəzifələr, o cümlədən bu il fevralın 7-də keçiriləcək prezident seçkilərinin, COP29 Konfransının və digər mühüm tədbirlərin yüksək səviyyədə və operativ qaydada işıqlandırılması ilə bağlı fəaliyyət planları barədə məlumat veriblər.
Sonda “Heydər Əliyev Azərbaycandır!” filmi nümayiş olunub.
Bölmənin digər xəbərləri
