“AzNav” istifadəçilərinin sayı 270 mini ötüb
Bakı, 17 yanvar, AZƏRTAC
“AzNav” naviqasiya sisteminin istifadəçilərinin sayı 270 mini ötüb.
Əmlak Məsələləri Dövlət Komitəsindən AZƏRTAC-a bildirilib ki, Prezident İlham Əliyevin əhaliyə innovativ xidmətlərin göstərilməsi və operativliyin, rahatlığın təmin olunması barədə tapşırıqları istiqamətində atılmış mühüm addımlardan biri də ilk milli naviqasiya sistemi olan “AzNav”dır. Unikallığı ilə seçilən bu naviqasiya sistemi istifadəyə verildiyi gündən bəri vətəndaşların xüsusi marağına səbəb olub. İstifadə qaydalarının rahatlığı, geniş funksionallığı ona olan diqqəti artırıb. Belə ki, hazırda sistemin istifadəçilərinin sayı 270 mini ötüb. Bunun 206 min nəfəri “Android” əməliyyat sistemli telefonlardan qalanı isə “iOS” əməliyyat sistemini dəstəkləyən telefonlardan qoşulub. Nəzərə alsaq ki, sistem bir il əvvəl vətəndaşların ixtiyarına verilib, qısa zaman keçməsinə baxmayaraq, istifadə sayına görə xeyli irəlidədir. Göstəricinin yüksək olması “AzNav”ın bir çox üstün cəhətlərə sahib olduğunu göstərir.
İstifadəçilər “AzNav”ı “iOS” (Apple), “Windows CE” əməliyyat sistemlərində olan bütün növ mobil cihazlardan və eyni zamanda, telefon və planşetlərdən ödənişsiz olaraq yükləmək imkanına malikdir. Həmçinin vətəndaşlar əlavə internet paketi götürmədən də sistemi oflayn rejimdə işlədə bilərlər. Bu isə onların vəsaitlərinə qənaət etməsinə imkan verir.
Dəqiq və hər zaman yenilənən GPS naviqasiya sistemi “AzNav” komitənin öz məhsulu olan Ünvan Reyestri İnformasiya Sisteminin (ÜRİS) məlumatları əsasında hazırlanıb. Sistem yeni və köhnə ünvanların əsasında hazırlanmış Naviqasiya Xəritəsinin məlumatlarından istifadə etməklə işləyir. “AzNav”ın əsas üstünlüklərindən biri də mütəmadi olaraq yenilənməsidir.
“AzNav” ölkəmizə səfər edən turistlərin və əcnəbi vətəndaşların ünvan tapmaq işini daha da rahatlaşdırır. Belə ki, əgər gələn qonaq gedəcəyi yerin dəqiq ünvanını bilmirsə sadəcə məkanın adını yazmaqla lazımi obyekti tapa bilər. Başqa sözlə, sistemdə ünvansız axtarış prinsipi təmin edilib. Qeyd edək ki, bir dəfə seçilən ünvanlar, obyektlər və marşrutlar isə avtomatik proqramın yaddaşında saxlanılır. Seçilən marşrut üzrə yerləşən muzeylərin, xəstəxanaların, turizm obyektlərinin, mehmanxanaların və bu kimi digər obyektlərin vizual görüntüsü də əks olunur. Bundan başqa turistlər gedəcəyi otelin, muzeyin, mehmanxananın, iaşə obyektlərinin axtarışını edən zaman həmin müəssisələr haqqında məlumatlar, onların əlaqə nömrələri ekranda görünür. Xəritənin 3 ölçülü (3D) rejimdə əks olunması binaların və istinadların da 3D göstərilməsini (seçimə görə) mümkün edir. Gələn qonaqları nəzərə alan “AzNav” Azərbaycan dili ilə yanaşı, rus, ingilis, ərəb, alman, ispan, fransız, italyan, türk və gürcü dillərini də dəstəkləyir və həmin dillərdə interfeysə malikdir. Bununla da onlar öz dillərində sistemi rahatlıqla işlədə biləcəklər.
“AzNav” taksi, poçt, yükdaşıma fəaliyyəti ilə məşğul olan şirkətlərin, təcili tibbi yardımların da işini olduqca sadələşdirir. Sistem paytaxt və regionlar üzrə ünvan axtarışı, tapılması, qısa zamanda və qısa marşrutla ünvanaçatma məsələlərinin operativ və rahat şəkildə həllini təmin edir. Belə ki, onlar trafik durumu funksiyasından istifadə etməklə gedəcəyi istiqamət üzrə yolda olan sıxlıq barəsində məlumat alırlar. Bu zaman isə sürücülərin bir ünvandan digər ünvana bütün alternativ yolları görmək imkanları var. Onlar ünvan barədə dəqiq koordinatları, qısa yolları və istiqamətverici digər məlumatları əldə edir. Eyni zamanda, sürücülər “Evə apar” funksiyasından istifadə etməklə cari məntəqədən “ev” kimi yaddaşda qeyd edilmiş məntəqəyə qədər marşrutun hesablanmasını həyata keçirə bilərlər. Başqa sözlə, nəqliyyat vasitəsi hərəkətə başladıqdan sonra istifadəçi gedəcəyi yerə nə zaman çatacağı barədə məlumatı əvvəlcədən öyrənə bilir. Bununla da həmin sürücülər vaxtlarına qənaət edir.
Sistemin köməyi ilə sürücülərin yol hərəkət qaydalarına əməl etməklə, nizamlılığı qorumaqla sükanı idarə etməsi təmin edilir. Belə ki, Naviqasiya Proqramı seçilmiş yol ilə hərəkət zamanı yolda nəqliyyat vasitəsinin maksimal sürətini, radarları, döngə nöqtələrini, parklamaları, yanacaqdoldurma məntəqələrini bildirir. “AzNav”ın sürət həyəcan siqnalı vətəndaşlarımızın radara düşməməyinə kömək edir. Radar və bəzi yol nişanları haqda bildirişlər həm görüntülü əks olunur, həm də səsli olaraq diqqətə çatdırılır. Hərəkət zamanı marşrut üzərində hər hansı hadisə ilə rastlaşdıqda ekranda əks olunan “SOS” funksiyasına daxil olmaqla bu barədə məlumat vermək də mümkündür.
Milli Naviqasiya Sistemi hazırda özündə 353 şəhər və qəsəbə, 5321 yaşayış məntəqəsi, 759227 bina və tikili, 77972 maraq nöqtəsi POİ (obyektlər), 117 körpü, 558 yolüstü piyada keçidi, 521 radar və kameranı əks etdirir.
Beləliklə, bu milli layihə ölkəmizdə həyata keçirilən sosialyönümlü işlərin tərkib hissəsi olmaqla ünvan məsələləri ilə bağlı işlərin çevik həllinə yönəlib. Əmlak Məsələləri Dövlət Komitəsi bu xidməti də istifadəçilərə təqdim etməklə ünvan axtarışı məsələlərində vətəndaşların və əlaqəli tərəflərin işinin yüngülləşməsini təmin edib.
Qeyd edək ki, “AzNav” ilk milli naviqasiya sistemi “Milli Net 2017” Milli İnternet Mükafatında E-gov Mobil tətbiqləri nominasiyası üzrə 2-ci yeri tutub.
Bölmənin digər xəbərləri
