BAKI KƏND VƏ QƏSƏBƏ FUTBOL BİRİNCİLİYİNİN QALİBLƏRİ MÜKAFATLANDIRILMIŞLAR
AZƏRTAC xəbər verir ki, Bakı Kəndlər Futbol Federasiyasının təşəbbüsü ilə paytaxtın kənd və qəsəbələri arasında üç yaş qrupu üzrə keçirilən payız-yaz birinciliyində 28 komanda mübarizə aparmışdır.
Azərbaycan Dövlət Bədən Tərbiyəsi və İdman Akademiyasının stadionunda qaliblərin mükafatlandırılması mərasimi keçirilmişdir. Mərasimdə Bakı Kəndlər Futbol Federasiyasının prezidenti hacı Vaqif Davudov, futbol veteranı Asim Xudiyev və başqaları çıxış edərək, istedadlı futbolçuların aşkarlanmasında bu cür yarışların əhəmiyyətini vurğulamışlar.
1993-1994-cü il təvvəlüdlü idmançıların yarışmasında ilk üç yeri Biləcəri, Aşağı Güzdək və Binəqədi bələdiyyələrinin komandaları tutmuşlar. 1991-1992-ci il təvvəllüdlü futbolçuların mübarizəsində isə ən yüksək nəticəni Aşağı Güzdək komandası göstərmişdir. Binəqədi ikinci, Sahil qəsəbəsində yerləşən 273 nömrəli məktəbin komandası isə üçüncü yeri tutmuşlar.
Gənclər arasında isə fəxri kürsünün ən yüksək pilləsinə “GEN” komandası yüksəlmişdir. Nəsimi bələdiyyəsinin futbolçuları gümüş, Şüvəlan bələdiyyəsi isə bürünc medallara layiq görülmüşlər.
Bölmənin digər xəbərləri
