Bakı-Maastrixt hava marşrutu üzrə sərnişin daşınması ilə bağlı danışıqlar aparılır
Bakı, 17 may, AZƏRTAC
Bakıdan Niderlandın Maastrixt şəhərinə hava marşrutu üzrə sərnişin daşınması ilə bağlı danışıqlar aparılır.
İqtisadiyyat Nazirliyinin mətbuat xidmətindən AZƏRTAC-a bildirilib ki, bu barədə iqtisadiyyat naziri Şahin Mustafayevlə Niderland Krallığı Senatının sabiq sədri, Niderland-Azərbaycan Dostluq Qrupunun rəhbəri Rene Van der Linden ilə görüşü zamanı Senatın sabiq sədri deyib.
Niderland-Azərbaycan Dostluq Qrupunun sədri Rene Van der Linden Maastrixt İdarəetmə Məktəbinin proqramının Azərbaycan Diplomatik Akademiyasında tətbiqinin əhəmiyyətini qeyd edib, bunun ölkələrimiz arasında əməkdaşlığın inkişafına müsbət töhfə verdiyini vurğulayıb. Sumqayıt Kimya Sənaye Parkı (SKSP) nümayəndələrinin Niderlandın “Çemelot” sənaye parkında olduğunu qeyd edən Rene Van der Linden Azərbaycan şirkətlərinin “Çemelot”da fəaliyyəti üçün imkanlarını diqqətə çatdırıb. Bildirib ki, Azərbaycanın böyük turizm potensialı var və bu sahədə Niderlandın Ali Turizm Məktəbi ilə əməkdaşlıq mümkündür. Rene Van der Linden Bakı-Maastrixt hava marşrutu üzrə karqo daşımalarının həyata keçirildiyini və hazırda bu marşrutdan sərnişin daşımalarında istifadəyə dair danışıqların aparıldığını da diqqətə çatdırıb.
Sumqayıt Kimya Sənaye Parkı barədə məlumat verən iqtisadiyyat naziri Şahin Mustafayev isə parkın 17 rezidentinin, sənaye parkında həyata keçiriləcək layihələrin investisiya dəyərinin 3 milyard dollara yaxın olduğunu, parkın rezidentlərinin bir hissəsinin artıq fəaliyyət göstərdiyini, digərlərinin isə bu il və 2019-cu ildə fəaliyyətə başlayacağını diqqətə çatdırıb. “SKSP-də yaradılan Peşə Təhsili Mərkəzinə Maastrixt İdarəetmə Məktəbi də cəlb oluna, Niderland şirkətləri ölkəmizdə yaradılan sənaye parklarında iştirak edə, Niderlandın “Çemelot” sənaye parkının rezidentləri Azərbaycanın sənaye parklarında fəaliyyət göstərə bilərlər. Azərbaycan əczaçılıq sahəsində də Niderland şirkətləri ilə əməkdaşlıqda maraqlıdır”.
Nazir Şahin Mustafayev ölkələrimiz arasında əməkdaşlığın intensivləşdirilməsi və təcrübə mübadiləsi ilə mövcud potensialdan daha səmərəli istifadənin mümkünlüyünü diqqətə çatdırıb, Azərbaycanda qeyri-neft sektorunun inkişaf etdiyini, maliyyə vəziyyətinin sabit olduğunu, viza rejiminin sadələşdirilməsinin və elektron vizanın tətbiqinin ölkəyə gələn turistlərin sayının artmasında önəmini vurğulayıb.
Bölmənin digər xəbərləri
