BAKI METROPOLİTENİNİN “HƏZİ ASLANOV” STANSİYASININ TƏNTƏNƏLİ AÇILIŞ MƏRASİMİ
İyulun 7-də ölkəmizdə səfərdə olan Avropa Birliyi nümayəndə heyətinin iştirakı ilə Bakı Metropoliteni “Həzi Aslanov” stansiyasının təntənəli açılış mərasimi olmuşdur. Mərasimin keçirildiyi meydana toplaşan minlərlə şəhər sakininin əllərində Prezident Heydər Əliyevin portretləri, Azərbaycanın dövlət bayraqları və dövlətimizin başçısının müdrik kəlamları yazılmış şüarlar var idi. Bakı Metropoliteni İdarəsinin rəisi Tağı Əhmədov qonaqları salamladı, “yeraltı saray”ın tikintisində çalışan, bu rahat nəqliyyat növündən istifadə edən sərnişinləri təbrik etdi, tikintiyə böyük maliyyə dəstəyi göstərmiş Avropa Birliyinin rəhbərliyinə təmənnasız köməyə görə minnətdarlığını bildirdi. Şəhər nəqliyyatının problemlərinin həlli, metropolitenin işinin yaxşılaşdırılması, yeraltı yolların inkişaf etdirilməsi məsələlərinin həmişə Prezident Heydər Əliyevin diqqətində olduğunu söyləyən Tağı Əhmədov məlumat verdi ki, Bakı metropoliteninin bu gün qapılarını sərnişinlərin üzünə açan sayca 20-ci stansiyanın – “Həzi Aslanov”un tikintisinə təqribən 4,1 milyon avro xərclənmişdir. Bu onu göstərir ki, Avropa Birliyi kimi nüfuzlu bir təşkilat Prezident Heydər Əliyevin rəhbərliyi altında aparılan daxili və xarici siyasəti dəstəkləyir, Azərbaycanda siyasi və iqtisadi quruculuq işlərinin düzgün istiqamətdə aparıldığını təsdiq edir. Natiq memarlar Rasim Əliyevin və Akif Abdullayevin bu gözəl arxitektura abidəsini - 200 mindən çox sakinə xidmət göstərəcək stansiyanı vaxtından 3 ay əvvəl istifadəyə verdiklərinə görə inşaatçılara təşəkkürünü bildirdi. Baş nazirin müavini Abid Şərifov Azərbaycan hökuməti adından paytaxtımızın infrastrukturlarının inkişafı proqramının ən vacib layihələrindən biri olan metronun “Həzi Aslanov” stansiyasının açılışı münasibətilə Avropa Birliyinin nümayəndələrinə minnətdarlığını bildirdi. O, bu gün Avropa Birliyinin iştirakı və maliyyə köməyi ilə ölkəmizdə bir sıra çox vacib layihələr həyata keçirildiyini, TASİS, TRASEKA və İNOQEYT proqramları çərçivəsində göstərilən texniki yardımları, fövqəladə yardım proqramını, Ermənistanın işğal etdiyi ərazilərdən müvəqqəti köçkün düşmüş soydaşlarımıza göstərilən humanitar yardım proqramlarını, ərzaq və digər layihələri xatırlatdı və dedi ki, işğaldan azad olunmuş və zərər çəkmiş ərazilərimizin bərpası proqramının maliyyələşdirilməsinə Avropa Komissiyasının göstərdiyi kömək nəticəsində 35 mindən çox məcburi köçkün öz daimi yerlərinə qayıdaraq məskunlaşmışdır. Bakı şəhərində əhaliyə göstərilən nəqliyyat xidmətinin yaxşılaşdırılması və əhalinin artımı ilə əlaqədar yerüstü nəqliyyat sistemindəki gərginliyin azaldılması məqsədilə Bakı metrosunun inkişaf etdirilməsi Prezident Heydər Əliyevin daim diqqətində olmuşdur. Bu gün açılışına toplaşdığımız “Həzi Aslanov” stansiyasının tikintisi də məhz Azərbaycan Prezidentinin Avropa Komissiyasına müraciətindən sonra ölkəmizə ayrılmış 30 milyon avro məbləğində Fövqəladə Yardım Proqramının ikinci tranşı hesabına həyata keçirilmişdir. İkinci tranş çərçivəsində bu stansiyanın tikintisinə 4 milyon 50 min avro vəsait ayrılmışdır ki, bunun da 3 milyon 550 min avrosu tikinti-quraşdırma işlərinə, 500 min avro isə avadanlıq alınmasına xərclənmişdir. Azərbaycan hökuməti isə öz büdcəsindən tunellərin tikintisinin başa çatdırılmasına 8,5 milyard manat vəsait ayırmışdır. Nümayəndə heyətinin rəhbəri, Avropa Birliyinin Xarici İşlər üzrə Dövlət Katibinin müavini xanım Marqerita Boniver, Avropa Komissiyası Baş İdarəsi rəisinin müavini Mişel Leyq bu tədbirdə iştirak etməklərindən böyük şərəf duyduqlarını bildirdilər, Azərbaycan hökuməti ilə Avropa Komissiyası tərəfindən maliyyələşdirilən və vaxtından əvvəl yerinə yetirilən bu layihənin Azərbaycan və Avropa xalqları arasında əməkdaşlığın daha da inkişaf etdirirlməsinə, möhkəmlənməsinə və davam etməsinə nümunə olduğunu vurğuladılar. Onlar Avropa Komissiyası çərçivəsində gələcəkdə ölkəmizdə həyata keçiriləcək layihələrə də yardım göstəriləcəyini söylədilər, Bakı sakinlərini təbrik etdilər. “Azərtunelmetrotikinti” Səhmdar Cəmiyyətinin sədri Şaiq Əfəndiyev inşaatçıların əməyinə verilən yüksək qiymətə görə təşəkkür etdi, qarşıdan gələn prezident seçkilərində metro inşaatçılarının dövlətimizin başçısı Heydər Əliyevin namizədliyini dəstəkləyərək, ona yekdilliklə səs verəcəklərini bildirdi. O, stansiyanın rəmzi açarını Bakı Metropoliteni İdarəsinin rəisi Tağı Əhmədova təqdim etdi. Sonra metronun “Həzi Aslanov” stansiyasının açılışını bildirən qırmızı lent kəsildi. Tədbir iştirakçıları stansiyada görülmüş tikinti-memarlıq işləri ilə ətraflı tanış oldular. Baş nazir Artur Rasizadə, Bakı Şəhər İcra Hakimiyyətinin başçısı Hacıbala Abutalıbov, İtaliyanın, Fransanın və Almaniyanın ölkəmizdəki səfirləri açılış mərasimində iştirak edirdilər.
Bölmənin digər xəbərləri
