Bakı Mühəndislik və INHA universitetləri arasında ikili diplom proqramı üzrə müqavilə imzalanıb
Bakı, 28 avqust, AZƏRTAC
Avqustun 28-də Bakı Mühəndislik Universiteti (BMU) və Koreya Respublikasının INHA Universiteti arasında ikili diplom proqramı üzrə müqavilənin imzalanma mərasimi və mətbuat konfransı keçirilib.
Təhsil Nazirliyindən AZƏRTAC-a bildiriblər ki, onlayn təşkil edilən mərasimdə Təhsil nazirinin müavini İdris İsayev, nazirliyin aparat rəhbərinin müavini Yaqub Piriyev, Beynəlxalq əməkdaşlıq şöbəsinin müdiri Nicat Məmmədli, Dövlət Proqramı İdarəetmə Qrupunun rəhbəri səlahiyyətlərini icra edən, sektor müdiri Müjdat Həsənov, Bakı Mühəndislik Universitetinin rektoru Havar Məmmədov, INHA Universitetinin rektoru Myeonguoo Cho, INHA Universiteti Tədqiqat və Biznes Fondunun prezidenti Taebeom Seo, akademik işlər üzrə prorektor Soobong Shin, tədqiqat və xarici əlaqələr üzrə prorektor Hyevook Von, Qlobal Təhsil Layihəsi Qrupunun dekanı Keeyoung Choi, beynəlxalq əlaqələr üzrə prorektor Jungho Kim, magistratura və doktorantura fakültəsinin dekanı Vonsup Hvang və digər şəxslər iştirak ediblər.
Bildirilib ki, Azərbaycan Prezidenti İlham Əliyevin Sərəncamı ilə təsdiq olunmuş “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində həyata keçiriləcək ikili diplom proqramı 4 mühəndislik ixtisası istiqaməti (inşaat, elektronika, elektrik və informasiya texnologiyaları) üzrə mütəxəssislərin hazırlanmasını nəzərdə tutur. Proqramın icra dövrü ərzində hər il, hər bir ixtisas üzrə 25 nəfər olmaqla, 100 nəfərin qəbulu nəzərdə tutulur.
INHA ilə aparılan danışıqlara əsasən, proqram çərçivəsində 2020-2021-ci tədris ilindən etibarən BMU-da bakalavriat pilləsinə qəbul aparılacaq. Dövlət İmtahan Mərkəzinin təşkil etdiyi I ixtisas qrupu üzrə qəbul imtahanının nəticələri elan olunduqdan sonra BMU tərəfindən sənəd qəbulu aparılacaq.
Qeyd edək ki, sözügedən proqrama sənəd qəbulu ilə bağlı elanla Təhsil Nazirliyinin saytında tanış olmaq mümkündür.
Bakalavriat pilləsində təhsilin 3 il müddətinə Azərbaycan Respublikasında ingilis dilində, 1 il müddətinə isə Koreya Respublikasında Koreya dilində aparılması nəzərdə tutulur. Abituriyentlər qəbul üçün ilk olaraq Dövlət İmtahan Mərkəzi, daha sonra INHA Universiteti tərəfindən BMU ilə birgə təşkil edilən onlayn riyaziyyat və fizika imtahanında və ingilis dilində müsahibədə iştirak etməlidirlər. Tədris INHA Universitetindən dəvət olunan və eyni zamanda, yerli müəllimlər tərəfindən aparılacaq. Sonda məzunlara həm Bakı Mühəndislik Universiteti, həm də INHA Universitetinin diplomları veriləcək.
Bölmənin digər xəbərləri
