ELM VƏ TƏHSİL
BAKI VƏ ZƏNCAN UNİVERSİTETLƏRİ ƏMƏKDAŞLIQ EDİRLƏR
Sentyabrın 7-də Bakı Dövlət Universitetində İran İslam Respublikasının Zəncan Universiteti ilə birgə 3-cü tətbiqi riyaziyyat seminarı öz işinə başlamışdır.
Seminarı BDU-nun rektoru, AMEA-nın müxbir üzvü, professor Abel Məhərrəmov açdı.
Azərbaycan Milli Elmlər Akademiyasının prezidenti, akademik Mahmud Kərimov çıxış edərək Azərbaycan ilə İran arasındakı elmi əlaqələrin daha da möhkəmləndirilməsində bu seminarın böyük əhəmiyyət daşıyacağına əmin olduğunu bildirdi.
Zəncan Universitetinin prorektoru, professor Cəfər Malaki universitetin rektoru Hüseyn Əskarianın tədbir iştirakçılarına məktubunu oxudu.
Əmək və əhalinin sosial müdafiəsi naziri, BDU-nun kafedra müdiri, texnika elmləri doktoru Əli Nağıyev “Ekoloji-iqtisadi dinamikanın iqtisadiyyatın inkişafında rolu”, İİR-nin Şərif Universitetinin professoru Bəhmən Mehri “Bəzi diferensial tənliklər üçün periodik həllərin mövcudluğu haqqında”, BDU-nun tətbiqi riyaziyyat fakültəsinin dekanı, AMEA-nın müxbir üzvü, Yusif Məmmədov “Qalıq üsulu və onun istilik keçirmə nəzəriyyəsi problemlərinin bəzi aspektlərinin həllinə tətbiqi” mövzusunda elmi məruzələr etdilər.
Sonra seminar ayrı-ayrı bölmələrdə öz işini davam etdirdi.