Bakıda "Qarabağ Kuboku” - Milli Mətbəx İrsi çempionatı keçirilir
Bakı, 14 oktyabr, AZƏRTAC
“Rebuild Karabakh” beynəlxalq sərgisi çərçivəsində “Qarabağ Kuboku” - Milli Mətbəx İrsi çempionatı təşkil edilib.
AZƏRTAC xəbər verir ki, çempionatın təşkilatçısı olan Azərbaycan Kulinariya Mütəxəssisləri Assosiasiyası (AKSA) 2019-cu ildən etibarən fəaliyyət göstərir.
Çempionatın əsas məqsədi Azərbaycan mətbəxinin zəngin ənənələrini, xüsusilə Qarabağ bölgəsinin unikal kulinariya irsini nümayiş etdirmək və regionlarımızın mətbəxlərini həm yerli, həm də beynəlxalq auditoriyaya tanıtmaqdır.
Azərbaycan Kulinariya Mütəxəssisləri Assosiasiyasının icraçı direktoru Fərhad Aşurbəyli gənc kadrların milli mətbəxin sirlərinə yiyələnmələrinin önəmli olduğunu bildirib.
“Çalışırıq ki, gənclər ustad dərslərində, ümumiyyətlə müsabiqə çərçivəsində bu sənətə daha dərindən yiyələnsinlər. Bu gün 120 gənc müsabiqədə iştirak edir. Əsas yaş qrupu 19-25-dir. Bizim münsiflər heyəti yaşlı və böyük təcrübəsi olan regional mətbəxin ustadlarıdır. Fəxri qonaqlarımız Özbəkistan, Türkiyə və digər qardaş ölkələrdəndir. Onlar həm öz mətbəxlərini burada təbliğ edəcək, həm də ustad dərsləri keçirəcəklər”, - deyə Fərhad Aşurbəyli əlavə edib.
Qeyd edək ki, AKSA yarandığı gündən peşəkar aşbazların inkişafına və ölkəmizdə qastronomiya sənayesinin güclənməsinə mühüm dəstək göstərir. Milli mətbəximizə tədbir iştirakçıları arasında maraq çox böyükdür.
Bölmənin digər xəbərləri
